‏سليمان عبد الباقي.. وغزوة المحبة!

«سندخل السويداء بالمحبّة»
‏
‏هيك عم يبشرنا لقلوق الجولاني سليمان عبد الباقي
‏
‏يا سلام.. بالمحبّة!
‏
‏وكأن السويداء ناقصها ورد وموسيقى وكلمات حلوة تطلع من تم السلطة.. والا صحي نسينا الموسيقى حرام بشرع السلطة، والكلمات الحلوة «فتنة» لعن الله من أيقظها
‏
‏سليمان عبد الباقي طل علينا عقناة الإخبارية ويا ريتو ما طل عم يحكي عن الروح الجامعة والتفاهم والسلم الأهلي وخصوصية المجتمع المحلي.. وكلنا لازم نصدق ونصفق وننسى!
‏
‏لكن خلينا نسأل كم سؤال بسيط: وين كانت هالمحبّة بتموز الماضي؟ وين كانت لما الدم سال بطرقات السويدا، والسلطة تبعك قتلت مئات المدنيين عالهوية بالصوت والصورة، واحتلت وحرقت ونهبت اكتر من 36 قرية وهجرت أهلها؟!
‏
‏عبد الباقي عم يحكي وكأن قوات الجولاني جاية تعمل «زيارة اجتماعية».. المشكلة أنه هالتصريح مو بس غباء سياسي.. هاد وقاحة عالهواء مباشرة، خاصة أنه أهل السويداء لسا ما انسوا كيف انفتحت أبواب الرعب عليهم بالدخول الأول.
‏
‏مستر عبد الباقي لما بتقول أنهم رح يدخلوا بالمحبة، فأنت عملياً عم تقول لأهالي السويداء: انسوا الي صار.. انسوا الجثث.. انسوا الرعب.. انسوا الحرق والتخريب والتهجير والخطف
‏
‏كلمة المحبة هي تغليف لغزوة جديدة.. متل الي عم يحط عطر فوق جثة
‏
‏أهل السويداء مانهم «عالبركة»، وبيعرفوا منيح أنه المحبة ما بتجي مع الأرتال ولا بتنفرض بالسلاح.. ولا بسؤال أنت سني والا درزي؟!.. لهيك خليك عم تمارس المحبة تبعك بالشام وبلاها هالكلمة المنمقة تبع المحبة الي ما منعرف مين نقّلك اياها لتطلع تقولا!
‏