‏افتتاح القرن.. تزفيت جسر الرستن يبهر العالم!

‏اليوم بسوريا صار في حدث استثنائي بكل المقاييس، حدث بيستاهل نشرات خاصة ومواكب رسمية وعدسات كاميرات، واستديوهات إخبارية للتحليل.. وبيستاهل كمان وفود دولية.. ويفضّل زعماء دول كانوا يجوا يشاركوا بهالإنجاز العظيم
‏
‏هالحدث هو افتتاح جسر الرستن بعد ترميم حفرة وتزفيتة وشوية دهان!
‏
‏يعني الحدث مو بناء جسر جديد ولا إنشاء مشروع استراتيجي ضخم، ولا تدشين أكبر محطة كهربا بالبلد..
‏
‏الحدث عبارة عن إعادة تأهيل جسر موجود من السبعينات، بعد ما انضرب بالحرب وتضرر، ورجع اشتغل بعد أعمال ترميم للحفرة استمرت حوالي سنة ونص بس!
‏
‏ومع هيك المشهد كان وكأن سوريا عم تدخل عصر النهضة.. الجولاني وصل والمواكب تحركت والكاميرات اشتغلت والتغطيات انطلقت، وبلش ضرب الفتّيش.. وكأن البلد عم يحتفل بإطلاق مركبة فضائية مو بإصلاح جزء من بنية تحتية موجودة أصلاً من عشرات السنين.
‏
‏الناس مو مستغربة من ترميم الجسر.. بالعكس أي طريق بيتصلح وأي جسر بيرجع يشتغل هو أمر إيجابي ومطلوب.. بس أنه ليش حجم الاحتفال أكبر من حجم الإنجاز نفسه؟
‏
‏وليش صار ترميم مرفق خدمي عادي عم يقدموه الشباب وكأنه فتح تاريخي؟ لدرجة إنك لو شفت المشاهد بلا صوت، ممكن تتخيل إنه عم يفتتحوا أكبر سد بالشرق الأوسط
‏
‏والأطرف من هيك إنه الجسر أساساً مو مشروع جديد.
‏الجسر بناه النظام السابق قبل أكتر من 50 سنة.. طبعاً هلق الجهابذة بيطلعوا وبيقولولك أنه أديب الشيشكلي هو الي بناه.. ونحنا منحب نقلكن راجعوا معلوماتكن بدقة لأن جسر الشيشكلي مالو علاقة بهاد الجسر!
‏
‏وبينما كانت العدسات مركزة عالافتتاح المبهر كان في ناس بمناطق تانية عم تسأل أسئلة مختلفة تماماً..
‏متل أهالي دير الزور يلي لساتهم عايشين تداعيات الجسور المدمرة والفيضانات والخدمات المنهارة.. وكلشي عمله أبو محمد أنه طلع عالدير شلح الجاكيت عضفة الفرات ورجع!
‏
‏بلد غارق بأزمات اقتصادية ومعيشية وأمنية وخدمية، عم تحتفل فيه السلطة بترميم حفرة وكأنها معجزة هندسية!
‏
‏الناس بدها كهربا مستقرة وفرص عمل وأمان وقانون وخدمات.. بدها تشوف مشاريع تغيّر حياتها فعلاً، لأن صار واضح أنه الناس ملت وقرفت هالاستعراضات من أول ما وصلت هيئة تحرير الشام للحكم بالشام
‏
‏صاير بجماعة الجولاني مع هالبلد متل الفرقة الموسيقية الي كانت قاعدة عم تعزف بسفينة التايتنك وهي عم تغرق.. مع أنه العزف حرام والعياذ بالله.. بس البلد معلش يغرق!
‏
‏بالنهاية منقلكن مبروك افتتاح الجسر.. مبروك تزفيت الطريق.. مبروك تزبيط الحفرة.. وانشالله بالأيام الجاي منشوفك يا أبو محمد عم تفتتح شي منعطف تاريخي يرجعك أنت وجماعتك على جبال تورا بورا، حيث اللباس الافغاني يليق بك!