‏هل تتحول سوريا من جمهورية إلى مملكة؟

بالسياسة ما في شي بيصير صدفة، والأنظمة ما بتعلن عن تحولات كبرى دفعة وحدة.. غالباً ما بتبلش بتهيئة المفاهيم الجديدة للرأي العام قبل تغيير النصوص.
‏
‏لما مسؤول من قلب السلطة متل حسن دغيم يطلع يحكي عن «الأنظمة الملكية الناجحة» ويقول إنه الحكم العائلي مو مشكلة، لازم نوقف للحظة.. مو لأنه حكى عن السعودية أو غيرها. بل لأنه بيطرح سؤال خطير: ليش هالفكرة عم تنطرح أصلاً؟!.
‏
‏سوريا اليوم رسمياً جمهورية.. لكن عملياً القرار محصور بحلقة مغلقة من عائلة الجولاني ودائرته الضيقة، ماسكة الملفات الحساسة بالسياسة والأمن والاقتصاد وغيرو.
‏
‏السلطة عم تقدم نفسها كمرحلة انتقالية.. بس المرحلة الانتقالية عادةً بتوسّع المشاركة مو بتضيقها.. وبتبني مؤسسات، مو بتعزز شبكة الولاءات.. وهون بيجي الخطر الحقيقي.
‏
‏لما الخطاب الرسمي يبدأ يطبّع فكرة إنه الحكم العائلي «شي طبيعي».. هيك بيكون عم يغيّر وعي الناس خطوة خطوة.. اليوم مقارنة.. بكرا تبرير.. وبعده تثبيت أمر واقع!.
‏
‏المفارقة إنه الملكيات الي استشهد فيها الدغيم قامت على تعريف دستوري واضح من لما تأسست بأنها ممالك وإمارات.. أما سوريا فدفعت أثمان باهظة بسبب تركّز السلطة داخل عائلة واحدة لعقود.. واليوم أي مؤشر على إعادة إنتاج نموذج مشابه، حتى لو بدون إعلان رسمي، فهالشي بيحمل رسالة خطيرة، وبيهدد بإعادة إنتاج الحلقة ذاتها!.
‏
‏بالنهاية.. السؤال مو: هل رح تتحول سوريا لمملكة؟.
‏
‏السؤال الحقيقي هو : هل عم يتم تأسيس نظام جديد بسوريا بيخلي الفارق بين الجمهورية والملكية مجرد تفصيل شكلي؟!.