‏إعادة رسم شرق الفرات.. كيف سقطت الجغرافيا بلا معركة؟

شرق الفرات ما سقط تحت هدير الدبابات ولا انهارت جبهاته بقصف المدافع.. اللي صار كان أهدى وأخطر!
‏
‏المنطقة تغيّرت بصمت غريب.. ما كان في حرب.. كان في تسوية هادئة متل عملية جراحية دقيقة بلا تخدير سياسي كافي.
‏
‏اتفاق انحكى عنه كـ«حقن دماء» بس بالحقيقة أعاد رسم الخريطة ونقل النفوذ وبدّل موازين القوة بثمن كردي كبير!
‏
‏من اللحظة الي انتهى فيها اجتماع باريس بين حكومة الجولاني ووفد إسرائيلي رفيع المستوى وبحضور هاكان فيدان بالكواليس بلّش المشهد يتغيّر.. انسحابات سريعة لقوات سوريا الديمقراطية من الشيخ مقصود والأشرفية ودير حافر ومسكنة والطبقة غرب نهر الفرات، وصولاً للرقة ودير الزور شرقي النهر.. انسحابات بلا اشتباكات تُذكر..
‏
‏معابر عم تتسلم وحقول نفط وغاز عم تنتقل لأول مرة لسلطة الجولاني من دون ولا طلقة!
‏
‏حدث بهالحجم ما فينا نفصله عن تفاهمات دولية أكبر، أبعد بكتير من اللاعبين المحليين
‏
‏اللي صار هو نتيجة مباشرة لاتفاق باريس.. تفاهم غير معلن قسّم سوريا لمناطق نفوذ: تركيا بالشمال، إسرائيل بالجنوب، وشرق الفرات منطقة إعادة ترتيب!
‏
‏بهالسياق واشنطن فتحت الباب للجولاني مو كمنتصر عسكري، بل كوريث سياسي يُدار من الخارج.
‏
‏كل هالتحوّل صار من دون اشتباكات.. انسحاب قسد ما كان هزيمة عسكرية بل نتيجة تفاهمات وضغوط.
‏
‏تقارير كتيرة بتحكي عن ضغط تركي مباشر ورعاية أمريكية واضحة قادها المبعوث الأمريكي توم برّاك، اللي ظهر بهالتسوية أقرب لـ«حاكم ظلّ» أكتر من وسيط.. توم برّاك نفسه سيء الصيت المعروف بالعمل لصالح الدول الي بينوفد عليها مقابل مكاسب شخصية على حساب المصالح الأمريكية
‏
‏بعض الأكراد شبّهوا برّاك بالحاكم العسكري الأمريكي بول بريمير بالعراق سنة 2003.. نفس الرجل اللي حاول يضرب البيشمركة بس فشل.. واليوم الاتهام إنو برّاك عم يحاول يعيد نفس التجربة بسوريا، بس بأسلوب أنعم ويبدو أنه نجح!
‏
‏حتى توقيت توقيع الاتفاق يبدو ما كان صدفة.. التوقيع صار بعطلة نهاية الأسبوع بواشنطن، بوقت بيكون الكونغرس والحكومة خارج دائرة المتابعة، وبمجرد ما توقّع الاتفاق صار أمر واقع وراح يتعاملوا معه بأمريكا كإشارة إنو «الأكراد موافقين»!
‏
‏السيناتور ليندسي غراهام كشف جانب خطير، لما قال بصراحة إنو لا هو ولا أي عضو بالكونغرس بيعرف تفاصيل الاتفاق. رسالة واضحة إنو اللي صار تجاوز المؤسسات الأمريكية، ومرّر تسوية مصيرية بعيد عن أي رقابة!
‏
‏الجولاني لحد الآن ما خضع لأي اختبار عسكري كامل.. كل «انتصاراته» كانت تحت مظلة تفاهمات دولية، وبرعاية تركية مباشرة عم يديرها هاكان فيدان، وبذراع تنفيذية بدمشق على رأسها أسعد الشيباني
‏
‏والاستثناء الوحيد بكل الأزمات الي صارت من لحظة سقوط نظام الأسد لليوم كان بمناطق الدروز.. هنيك انتهى بانسحاب قوات الجولاني تحت مقاومة أهل الجبل بمساعدة نيران الطيران الإسرائيلي
‏
‏يعني فينا نقول الجولاني نجح ع طاولات التفاوض بعد تقديم ضمانات وتنازلات للخارج، مو بخوض حرب تقليدية.. والفرق بين الاتنين كبير كتير.. الاختبار الحقيقي لأي سلطة ناشئة ما بيكون بالفراغات ولا بالصفقات، بل لما تنفرض عليها معركة بلا رعاة ولا وسطاء!