‏أمر عمليات.. هل ينفذ الجولاني أوامر ترامب؟!

بعد ما صار الجولاني هو «الرجل الذي يدير سوريا بشكل مذهل» بحسب وصف دونالد ترامب، انتقل المشهد من مرحلة السيطرة الميدانية إلى مرحلة الاستحقاقات الدولية
‏
‏ويبدو أن الفاتورة اللي انكتبت على الجولاني صارت مستحقة، والطلب الأمريكي واضح وما فيه لبس: «خلصونا من حزب الله في لبنان»
‏
‏المعطيات بتقول إنه ترامب اللي ما بيعرف المجاملات، حط النقاط على الحروف أمام نتنياهو.. وصرح بأنه الجولاني هو الأداة الأنسب لتنفيذ المهمة..
‏
‏«شخص عينته أنا وأردوغان» – هيك وصفه ترامب – هو القادر على التعامل مع الحزب بشكل جيد.. هي الكلمات ما كانت مجرد تصريحات، بل أمر عمليات بيحط الجولاني وقواته بخانة المرتزقة اللي عم يسوقهم البيت الأبيض لحروبه الخاصة!
‏
‏مصادر مطلعة بتقول إنه الضغوط الأمريكية بلغت ذروتها، والجولات الخارجية للجولاني والوساطات البريطانية لثني ترامب عن شرط «دخول لبنان» كلها فشلت.
‏
‏داخل دهاليز هيئة تحرير الشام، الأصوات بدأت تعلى، ومسؤولين كبار بالهيئة عم ينقلوا كلام خطير: «نحنا أمام عاصفة لا مفر منها إذا ما دخلنا لبنان»
‏
‏المشهد اليوم بيشبه رمي عود ثقاب داخل برميل متفجرات، فالجولاني صار اليوم رهينة لوعود قدمها للغرب منشان يضل بالحكم. وبينما عم يحاول يوازن بين كونه زعيم و بين كونه أداة تنفيذ، عم يكتشف إن التورط بالحرب ضد حزب الله هو مقامرة وجودية رح تحرق كل الأوراق اللي رتبها لسنين طويلة!
‏
‏الأمريكان اليوم بيتعاملوا مع الجولاني وجماعته بعقلية «الصحوات» اللي جربوها بالعراق وأفغانستان.. قوة عسكرية بتنفذ المطلوب، وبالمقابل بتاخد ضمانات مؤقتة
‏
‏هيك بتصير الصورة أوضح ومنتأكد أنه الجولاني مجرد بيدق بملعب كبير، واللبنانيين والسوريين هنن اللي عم يدفعوا ضريبة الارتهان!
‏
‏ومن سخرية القدر بكل هالحكاية أنه تل أبيب رافضة دخول قوات الجولاني لبنان وضرب الحزب..
‏
‏المؤسسة الأمنية الإسـرائيلية وبحسب القناة 12 العبرية بتعتبر أنّه هادا السيناريو الأسوأ.. لأن مو معقول يستعينوا بإرهابي لدخول لبنان والوصول للجنوب.. هيك بيصير فيهن متل اللي جاب الدبّ لكرمه!
‏
‏خلاصته.. العاصفة اللي عم يحكوا بسوريا عنها حقيقة واقعة، والقرار صار أصعب من أي وقت مضى: إما تنفيذ الأجندة الأمريكية والدخول في أتون معركة خاسرة ومستنزِفة، أو خسارة الغطاء الدولي اللي بيعتبره الجولاني اليوم طوق نجاة لمستقبله السياسي