‏العاصفة قادمة.. محروقات الجولاني تحـــ.رق ما تبقى من صبر السوريين!

‏الوعود الوردية طلعت حبر على ورق!
‏
‏مبارح الجولاني كان عم يوعد الناس بالاستقرار والرفاهية، واليوم صحوا السوريين على كابوس رفع أسعار المحروقات بشكل جنوني
‏
‏الزيادة بالبنزين تجاوزت 30 %، والمازوت قفز أكتر من 1700 ليرة عالعملة القديمة ضربة وحدة، حتى جرة الغاز اللي هي أبسط حقوق البيت السوري زادت 26 ألف ليرة بضربة وحدة!
‏
‏وين المشاريع والنهضة؟ وين الصندوق السيادي؟ وين التبرعات المليونية؟
‏
‏من أول ما استلمتوا وأنتوا شغالين عرض عضلات وصور بالقصور وتوقيع عقود وهمية.. ضحكتوا على العالم أول فترة بكلمتين عن تخفيض الأسعار وتحسين الكهرباء
‏
‏والنتيجة.. ربطة الخبز اللي كانت بـ 400 صارت بـ 4000 ليرة! وفواتير الكهرباء صارت تسونامي عم يضرب البيوت بالملايين.. أقل فاتورة اليوم عم توصل لـ 500 ألف ليرة، يعني المواطن بدو يشتغل شهر كامل بس ليدفع حق ضو اللمبة!
‏
‏سياسة تشليح وبيع البلد باسم الاستثمار.. السلطة اللي عم تدعي بناء دولة، عم تدير سوريا بعقلية مافيوية وشوارعية تماماً متل اللغة الشوارعية الي بتدفش جماعتها التيكتوكرز ليهاجموا فيها كل حدا بيحتج عهالوضع المزري
‏
‏عم يبيعوا مقدّرات البلد لجهات مجهولة تحت اسم الاستثمارات.. حتى هوية سوريا وتاريخها ما سلم منهم.. ألغوا عيد الشهداء كرمال يرضوا أطراف خارجية، وعم يغيروا ملامح البلد ليمسحوا كل شي بيشبهنا.. وفوق منها جماعتهم بينتشروا متل الذباب عالسوشال ميديا ليكتبولنا «أحمدنا بيشبهنا».. فعلاً السلطة ومطبليها بيشبهوا بعض.. بس مابيشبهوا السوريين.. وفعلاً متل ما قال أحدهم: أنه الي صار بسوريا هو عبارة عن قاطع طريق صار حاكم!
‏
‏وبدل ما هالسلطة تسمع لوجع الناس، راحت جندت شلة تيكتوكرز وذباب إلكتروني مدارين عبر غرفة واتساب.. وظيفتهم يهاجموا ويخونوا أي حدا بيفتح تمه بكلمة حق.
‏
‏ووصل فيهم الانحطاط لدرجة الطعن بالأعراض، متل ما صار مع أهالي الشام اللي احتجوا على فواتير الكهرباء.. طلعوا مأجورين السلطة وقتها وعلى رأسهم هاد المبهدل أبو شام يتهم الناس بشرفهم وأنه كانوا يبيعوا بناتهم عالحواجز لعناصر النظام السابق!
‏
‏طيب.. من وقت سقوط نظام الأسد لليوم.. عقوبات قيصر ومعظم العقوبات الدولية على سوريا انشالت.. وكل العالم وقف معكن عأساس، رعاية كاملة من دول بالخليج وتركيا وأوروبا.. واعتراف وزيارات وتهريج.. وشو النتيجة؟!. النتيجة أنه سوريا بعد قانون قيصر أسوأ مما كانت عليه أيام قيصر.. غلاء معيشي وخصخصة ورفع الدعم عن الخبز والطاقة والصحة.. وبطالة وفصل تعسفي.. وموظفين شهر بيقبضوا تلاتة لا.. وشلليات ومحسوبيات بالمؤسسات.. وتعيينات على قاعدة الأقربون أولى بالمناصب!
‏
‏يا أخي رجعولنا قيصر كرمال الله.. ومسامحينكن بالنظام الجديد.. بلاه.. خدوه بيضولوا صفحته بمكان تاني.. حاجة كابس ع نفس السوريين، وقال بيشبهن.. بس بدي أعرف بشو بيشبهن؟!
‏
‏المشكلة أنه أغلب السوريين ماكانوا بيعرفوا الجولاني ولا كيف كان عم يحكم إدلب.. بس نحنا كصحافة كنا متابعين كيف كان عم يدير الشمال بالاحتكار والترهيب، ونقل نفس التجربة لباقي سوريا.. الي ما جابت للسوريين غير الفقر والقمع وتدمير ما تبقى من كرامة!
‏
‏خلاصته.. الكلمة الأخيرة بالنهاية للشارع اللي داق المر ولسا واقف على رجليه.
‏
‏فكركم السوري اللي وقف بوجه المدافع رح يسكت قدام حرامية اللقمة؟
‏
‏الجوع كافر، والناس اللي عم تبلع وجعها اليوم عم تخزّن بصدورها بركان، وإذا انفجر هالبركان ما رح يضل لا قصور ولا صناديق سيادية ولا كراسي!
‏
‏الصبر إله حدود، وصبر السوريين خلص.. والأيام الجاية رح تثبتلكم إنه لقمة عادلة بتسوى كل استثماراتكم الوهمية، والشارع اللي طلع كرمال كرامته، ما رح يركع كرمال جرة غاز أو فاتورة كهرباء.. انتبهوا.. هي مو سحابة صيف، هي العاصفة اللي عم تتشكل.. والوقت عم يخلص.