‏هذا هو ردنا على طلب «مطبلجية» السلطة بإخراج مـ.قاتـلـ.ي قـنـديل من سوريا

بكل مرحلة استبدادية بسوريا، ما بيكتمل المشهد بلا طبقة من المطبلين.. بسوريا اليوم ما اكتفت سلطة الجولاني بإعادة إنتاج القمع، بل أعادت تدوير الإعلام نفسه، بس مع فوارق جديدة: الوقاحة صارت أضعاف والكذب صار مهنة رسمية!
‏
‏الي عم نشوفه مو إعلام، بل مرتزقة إلكترونية على هيئة بشر.. أبواق عم تبرر وتزوّر وتطبّل بالاتجاه المطلوب، وبدها الناس تصدّق!
‏
‏أكتر الأمثلة فجاجة ووقاحة، خطاب موسى العمر وجميل الحسن وهادي العبدالله وتوابعن المكرّر ضد قسد.. بيطلوا علينا بنبرة وطنية مصطنعة وبيقولوا خلي قسد تطلّع مقاتلي «قنديل» غير السوريين من سوريا
‏
‏سؤال بسيط بالله.. مو الأجدر بسلطة الجولاني تطلع 18 ألف إرهابي أجنبي مزروعين بجسد ما يسمى «الجيش الجديد» من سوريا؟
‏
‏18 ألف جهادي من 16 دولة عربية وأجنبية.. موجودين بسوريا بسلاحهم وعتادهم وفكرهم المتطرف، وفوق منها تم دمجهم بـ«الجيش الجديد» ومنح قياداتهم رتب ومناصب عليا!
‏
‏هون نحنا ما عم نحكي غن إشاعات، بل عن تعيينات رسمية.. أكثر من 49 قيادي جهادي أجنبي تم تعيينهم بمناصب عليا عسكرية ومدنية.. أبرزهم عبد الرحمن حسين الخطيب المعروف بـ«أبو حسين الأردني» واللي صار قاااائد الحرس الجمهوري
‏
‏أي جمهورية؟ وأي حرس؟ ولمين يا أبو حسين؟!
‏
‏زميله أبو مريم الأسترالي اتسلّم منصب اقتصادي رفيع داخل القصر
‏
‏عبد الله المحيسني، إرهابي سعودي مطرود من بلاده، ‏تم تبييض صفحته بشهادة دكتوراه من جامعة دمشق العريقة بأكبر عملية غسل أكاديمي بتاريخ التعليم السوري!
‏
‏وطبعاً الأسماء الباقية الي تم ترقيتها كتيرة من علاء محمد عبد الباقي مصري الجنسية، لعبد العزيز خدابردي التركستاني من الإيغور، وسيف الدين تاجيك، ومولان ترسون عبد الصمد الطاجيكي، وعمر جفتشي التركي
‏
‏كل هدول قيادات بالجيش «الوطني» والإعلام المطبل أصم أعمى أبكم، لا.. بل عم يهاجم الأكراد ويسأل عن مقاتلي قنديل!
‏
‏آلاف المقاتلين الإيغور ومن آسيا الوسطى تم دمجن بوحدة جديدة تُسمّى الفرقة 84..
‏
‏18 ألف إرهابي عابر للقارات موزعين بإدلب وريفها خصوصاً.. بس طبيعي الإعلام المأجور مايشوفهم، لأن العمى هون وظيفة وإلها راتب!
‏
‏المهزلة ما وقفت عند هذا الحد.. عند اعتقال أي شخص من الساحل بمناطق قسد، بيطلقوا عليه فوراً تهمة «فلول» وبيصوروه كإنجاز!
‏
‏ما حدا سأل أنه هاد إما كان مجرد حرس حدود هرب لحظة سقوط النظام من إرهابكن؟ أو موظف فصلتو السلطة الجديدة واضطر يروح عمناطق قسد ليشتغل ويعيش.. بس عبث التهمة جاهزة.. والمطبلاتية جاهزين للترويج
‏
‏وهلق منوصل لذروة النفاق.. موسى العمر وقبل سقوط النظام، قالها بوضوح بمقابلة مع معاذ محارب أنه 75 % من السوريين «أغلبية صامتة» The silent majority، لا مع الأسد ولا مع الثورة، وأنها بتصفّق لمن يحكم حتى لو كان جبهة النصرة!
‏
‏طيب يا موسى، وفق منطقك، هدول الي هنن أغلبية صامتة نفسهم اليوم صامتين تحت حكم النصرة.. يعني مو قناعة بالحكام الجدد وإنما خوف من بطشه وإرهابه..
‏
‏فكيف هلا طلع معك أنه الأغلبية الصامتة داعمة للقيادة الجديدة!
‏
‏أيمت تحوّل الصمت لدعم؟ ومين أعطاك حق التحدث باسم الصامتين؟
‏
‏إذا كانت هي الأغلبية صامتة فعلاً.. كيف عرفت أنها صارت تؤيد؟ هل صوّتت؟ هل حكت؟ أم أنه الدعم يُقاس اليوم بدرجة الخوف؟!