‏«مهرجان المفيض».. الجولاني يضحك على أنقاض دير الزور!

بعد حبس مياه الفرات لسنوات
‏
‏أردوغان صديق الجولاني صدّر خطر فيضان النهر للأراضي السورية
‏
‏مياه الفرات اجتاحت دير الزور والرقة وأفسدت المحاصيل ودمرت الجسور وأغرقت منازل وتسببت بعدة وفيات
‏
‏وفوق منها «فخامة الرئيس» أبو محمد «وصلَ مسروراً» إلى المنطقة الشرقية لتفقد الكارثة
‏
‏توزيع ابتسامات يمين وشمال وتحيات وشوبشة.. أنه شو المفرح أبو محمد حتى البهجة ما فارقت مبسمك.. ترى هي كارثة مو «مهرجان المفيض»!!
‏
‏والا لساتكن بتعالجوا الكوارث بالتريندات والمواكب والتحيات.. وعجيب ما طلع لهلأ ولا تيكتوكرز من جماعتك وقال: «صار عنا رئيس نخاف عليه من الفيضانات»
‏
‏بزمناته طلع بشار الأسد يتفقد أضرار الزلزال بحلب وكان متلك عم يوزع ابتسامات.. واشتغلت العناوين بوسائل اعلام المعارضة وقتها أنه «الأسد يضحك على أنقاض حلب».. اي شو الوضع هلق؟ رح يكتبوا عنك نفس الشي؟ والا انت ابتسامتك بتهدي السيول الجارفة؟!
‏
‏عكل حال، بدال هالزيارة الاستعراضية كان المفروض أول شي تطلعوا تعتذروا على فشلكن بإدارة مياه الفرات وتعلنوا عن تعويضات للمتضررين، وتشرحوا للناس كيف غرّقتوا بذكائكن وبالتعاون مع الأتراك منطقة الفرات بالكامل.. وذكائكن حطولنا اياها بين 1637 قوس عقولة سلنغو!
‏
‏وتاني شي كان المفروض تطلعوا لو ببيان إدانة منمّق لصديقكن التركي الي من كتر ما بيودكن حطكن بموقف «لا تُحسدون عليه».. التركي الي ما راعى مبدأ حسن الجوار أبدا مع سوريا.. وبملف مياه الفرات يا أما بيحبس المي عن السوريين وبيخالف اتفاقية ال٥٠٠ متر مكعب بالثانية وبنزلها عال٢٠٠ متل ماكان يعمل قبل.. أو بيضخ ٢٠٠٠ متر مكعب بالثانية وبيغرّق البلاد والعباد بجريمة بيئية واقتصادية موصوفة بكل القوانين والأعراف الدولية.
‏
‏بس بكل هاللي عم يصير في سؤال محيّرنا من لما وصلتوا للحكم وسيطرتوا على دمشق.. وحيرنا أكتر بعد ما سيطرتوا عدير الزور والرقة كمثال قريب من 4 شهور.. أنه وين «التحرير» بالموضوع؟!
‏
‏بدير الزور تحديداً من لما أخدتوا مكان قسد، وخلال 4 شهور وقعت كوارث بالمعنى الحرفي للكارثة
‏
‏أول شي دمرتوا حراقات النفط مصدر معيشة آلاف العائلات هنيك خلال سنوات الحرب من دون تقديم أية بدائل
‏
‏تاني شي اشتريتوا القمح من المزارعين بتسعيرة متدنية ما بتغطي تكاليف الإنتاج، وفوق منها طلع أحمدكن وزاد التسعيرة شوي وسماها مكرمة مو حق لأهل الدير
‏
‏تالت شي طلع أبوه للغالي ووصف أهل دير الزور بـ«الهمج» وعديمي الفهم والثقافة
‏
‏رابع شي عملتوا تسويات غامضة مع رموز نظام الأسد وأذرع إيران وأبرزهم نواف البشير والمرسومي وغيرهم كتار
‏
‏خامس شي ظهرت أزمة الرواتب المتدنية قياساً بالرواتب بعهد قسد، وتأخر بالصرف وفصل تعسفي خلال دمج المؤسسات
‏
‏سادس شي انتشر الفقر والقمامة وتم تداول فيديوهات لمواطنين عم يدوروا على طعامهم بين النفايات
‏
‏وكوارث تانية متل تهجير مئات العائلات من «شمال السكة» بالرقة بحجة التنظيم العمراني وغيرها وغيراتها
‏
‏أنه إذا هاد هو التحرير.. لكن الاحتلال كيف بيكون؟!