‏خدم نتنياهو الجدد.. سقوط كذبة “خيبر خيبر” في سوريا!

يبدو إنه تعريف السيادة بسوريا الجديدة اتغير!
‏
‏فالسيادة حسب النسخة المحدّثة من حكومة الجولاني صارت ببساطة إنه الطيارات الإسرائيلية تمرّ بالسماء السورية بكل هدوء.. بينما أبو محمد بيتكفل بحراسة الأرض حتى ما حدا يدايق الأخوة الأعداء بتل أبيب، بعد ما صرعوا راسنا جماعة فخامته بشعار «خيبر خيبر يا يهود جيش محمد سوف يعود»!
‏
‏هيك وبدون أي ضجة، تحولت البلد يلي كانت تنوصف بيوم من الأيام بدولة مواجهة، مو لدولة محايدة لا سمح الله، بل لشي بيشبه ممرّ جوي مفتوح بخريطة العمليات الإسرائيلية بالشرق الأوسط
‏
‏حساب سلاح الجو الإسرائيلي الرسمي نشر صور لمقاتلات إف-16 وهي بطريقها لتنفيذ هجمات داخل إيران.
‏
‏ التدقيق بالخلفية الجغرافية الظاهرة تحت الطائرات كشف بوضوح إنه اللقطات مأخوذة فوق مدينة دير الزور.. كان واضح بالصور نهر الفرات.. حتى أفيخاي أدرعي نشر فيديو بفرجينا مسار المقاتلات الإسرائيلية كيف بتطلع من قاعدة رامات ديفيد وبتدخل عمق الأراضي السورية باتجاه دير الزور ومن هنيك لإيران روحة رجعة!
‏
‏
‏المشهد ما كان تسريب استخباراتي ولا صورة التقطها هواة.. بالعكس كانت مادة دعائية نشروها الإسرائيليين بأنفسن.
‏
‏والصدمة الأكبر أنه ما صدر أي بيان رسمي من جماعة أبو محمد يدين خرق السيادة، ولا حتى يطلب توضيح.. لا بيان من وزارة الخارجية، ولا موقف من الحكومة، ولا حتى خطاب إعلامي يشرح للسوريين كيف صارت أجواء بلادهم جزء من مسار العمليات الجوية بالحرب الإقليمية
‏
‏لكن القصة ما بتوقف عند مجرد عبور جوي!
‏
‏تسريبات متقاطعة عم تحكي عن شي أخطر: وجود غرفة عمليات إسرائيلية غير معلنة داخل أحد فنادق العاصمة دمشق لإدارة جزء من العمليات المرتبطة بالحرب ضد إيران
‏
‏التسريبات تحدثت كمان عن نصب رادارات مرتبطة بالمنظومة الإسرائيلية بمناطق قريبة من الضمير ومراكز بين يعفور والصبورة.
‏
‏وبنفس الوقت يلي الطائرات الإسرائيلية عم تعبر الأجواء السورية بدون أي عائق، كانت مناطق الجنوب والحدود مع العراق ولبنان عم تشهد استنفار واسع لقوات الجولاني.. بس مو لردع إسرائيل، بل لمنع أي نشاط ممكن يستهدفها!
‏
‏مصدر أمني سوري نقل لوسائل إعلام إقليمية إنه القيادة بدمشق أصدرت تعليمات واضحة للقادة الميدانيين بإحباط أي خلية ممكن تخطط لتنفيذ عمليات ضد إسرائيل.. والمصدر أكد كمان أنه حكومة الجولاني بلّغت واشنطن مباشرة إنها عم تشتغل لمنع تنفيذ أي هجمات ضد إسرائيل من الأراضي السورية
‏
‏المفارقة إنه هالسياسة طالعة من نفس السلطة يلي بنت جزء كبير من خطابها السياسي على اتهام النظام السابق بحماية حدود إسرائيل!
‏
‏سلطة ما اكتفت بالصمت على اختراق الأجواء، بل تحولت عملياً لجهة عم تضبط الأرض السورية حتى تمنع أي تهديد لإسرائيل.. حماية مجانية، بدون اتفاق معلن وبدون أي مقابل سياسي واضح غير بقاءها بالحكم.
‏
‏أنصار الجولاني الي كانوا يتهموا الدروز بالسويداء بأنهم عم ياخدوا رواتب من إسرائيل بعد تقرير مدفوع الأجر من قطر بصحيفة الواشنطن بوست.. شو موقفهم اليوم من معرفة أن أبو محمد وجماعته عم يشتغلوا «خدمتجية» عن إسرائيل مجاناً بأكلهم وشربهم يعني.. مع امتياز نومة آمنة بالقصر!
‏
‏هيك بتنهار كذبة جديدة من أكاذيب السلطة المتطرفة أنه النظام السابق كان حامي حدود إسرائيل.. متل ما انهارت أكاذيب سابقة عن سجن صيدنايا الي أضرت بسردية وحقوق ضحايا السجن.. متل كذبة المكبس البشري والطوابق تحت الأرض وأنه المعتقلين فيه بعشرات الآلاف، بينما أظهرت الوثائق بعد سقوط نظام الأسد أنه عدد المعتقلين يوم السقوط كان 4200 معتقل فقط
‏
‏يضاف إلها كذبة المليون شهيد الي أثبتت التقارير الأممية والمنظمات الحقوقية أنه إجمالي ضحايا الحرب خلال 14 عام نحو نصف مليون شخص وتلت الضحايا من قوات النظام وأنصاره
‏
‏نفس الشي بينطبق على أرقام اللاجئين.. فبينما تكررت رواية 15 مليون لاجئ سوري، أكدت كل الأرقام الأممية أنه عدد اللاجئين بالخارج تراوح بين 5 و 6 مليون شخص.. شيلكن عن هبدة أسعد الشيباني تبع الـ4 مليون منزل مدمر!
‏
‏هالتضخيم والكذب الغير مبرر انبنى لحتى يبرر انتقال السلطة لجماعة جهادية متطرفة متوحشة معروفة الجرائم والمجازر قبل وبعد استلامها الحكم.. شيطنت النظام السابق أكتر من اللازم لحتى تصير هيي الكيوت قدام النظام الي راح.. بس متل مابقولوا حبل الكذب قصير!
‏
‏بالنهاية.. الحقيقة اليوم ما عادت بحاجة لتحليل طويل.. أنتوا عم تشوفوا بعيونكم، والجماعة عم يشتغلوا بوقاحة وعالمكشوف.. ما بهمن سيادة ولا أرض محتلة ولا كرامة ناس ولا أي شي وعم يتعاملوا مع أي قصة بطريقة البزنس.. ولك وياريت عم ينجحوا بالبزنس.. فمبروك عليكم النظام الجديد.. والسلام عليكم.