‏«جمهورية التقريباً» النسخة التجريبية من الدولة السورية!

«نحنا تقريباً دولة»… هالحكي قاله وزير الإعلام بحكومة الجولاني.. ‏
‏
‏قال تقريباً قال.. بتحسوا هون انه حمزة المصطفى عم يعلن عن افتتاح نادي ليلي وما ضل ناقصه إلا الرقاصة، مو تصريح مسؤول عن دولة فيها ملايين الناس، أو انه عم يحكي عن «دولة بنسخة تجريبية»!
‏
‏هالتصريح مو بس خطأ لفظي، هو انعكاس صادم لعقلية حكومة ما بتعرف شو يعني الدولة، ولا سيادة القانون، ولا حتى أقل مقومات الإدارة!
‏
‏اتخيلوا الوزير أبو صطيف عم يحكي عن «دولة تقريبية».. ليك ترى إذا بدك فيك كمان تأجل قيامها حتى إشعار آخر مافي مشكلة، قاعدين شو ورانا؟!
‏
‏أحياناً الخطأ باللفظ بيكون صواب بالمعنى.. يعني عنجد لسا ما في دولة بسوريا.. طالما مافي عدل، والمواطنين بلا حقوق، وسلطة بتتعامل مع سكان البلد مو كمواطنين بل كمؤمنين وكفار ومرتدين وأهل كتاب وغيرو، والقتل والتهجير عالهوية شغال، والمناصب عم تتوزع كغنائم حرب.. أكيد هي مو دولة ولا حتى «تقريباً»!
‏
‏خلينا نعمل لائحة إنجازات تقريبية: في تقريباً قضاء، بس القاضي لازم يسأل الأمير والشيخ قبل ما يحكم.. في تقريباً جيش بس الولاء أهم من القانون.. في تقريباً مؤسسات بس القرار الحقيقي طالع من غرف مغلقة ما حدا بينتخبها ولا بيحاسبها.
‏
‏يعني الدولة عند الجولاني متل الواي فاي الضعيف.. الإشارة موجودة بس ما في إنترنت.. في شعار دولة.. في علم.. في وزارة إعلام، بس لما تجي تسأل عن محاسبة أو شفافية أو حقوق مواطن.. بيطلعلك تنبيه: «الخدمة غير متوفرة حالياً»!
‏
‏يا أخي الناس صارت عم تحلم بتقريباً عدل، وتقريباً حماية وأمان، وتقريباً حياة كريمة.. يعني الجماعة قنوعين بدهم بس تحسسوهم أنه في شي من هالقصص تقريباً!
‏
‏بالنهاية.. بلد كامل عايش على وضع الطيران، مفصول عن الواقع تحت سلطة الأمر الواقع، ومطلوب من الناس تصفق على وهم اسمه دولة، وهو بالحقيقة مجرد سلطة عم تجرب تتعلم كيف تصير دولة على حساب دم السوريين!