‏إذا أردت أن تعرف من زرع طريق ماكرون بالعــ.بوات.. فعليك أن تعرف هذا الأمر!

زيارة تاريخية للرئيس الفرنسي إيمانويل ماكرون لدمشق – هيك وصفوها –
‏
‏والمحيسني الي كان صارعنا من كم سنة أنه ماكرون اللعين «حامل لواء الحرب ضد سيدنا محمد» وأنه هالماكرون ماكر وبغيض وأبتر.. وأنه «يا للعار» وقت استقبلوه حكام السعودية وقطر والإمارات.. اليوم طلع ليخبرنا أنه هالزيارة إنجاز للجولاني وأنه أبو محمد بلحيته وثباته قدر يلفت نظر الملك الأعجمي!
‏
‏ما علينا

‏الجماعة استعدوا كتير لاستقبال الرئيس الفرنسي، وحرفياّ سكروا العاصمة دمشق.. قطعوا الطرقات الرئيسية وأغلقوا شوارع ومفارق وأسواق.. لك حتى المارة العاديين حبسوهم عالأرصفة ساعات.. كل هالشي منشان سلامة الضيف.. بس كأنك يا بو زيد ما غزيت!
‏
‏هيك اليوم الصبح، بمحيط مقر إقامة ماكرون بفندق فور سيزون، بتنفجر مجموعة عبوات ناسفة.. مقاطع مصورة أظهرت كيف حدث انفجار بعض هي العبوات.. مقطع ظهر فيه انفجار سيارة مركونة بجانب الطريق مقابل الفندق تماماً.. ومقطع مصور تاني بيظهر لحظة انفجار عبوة ناسفة بحاوية قمامة عند جسر فكتوريا.. بس من حظه لماكرون أنه كان صرلو شي ربع ساعة طالع ع قصر الشعب وما كحل عينه بحقل الألغام الي زرعوله اياه الي ما منعرف مين، وما منعرف إذا هالرسائل المفخخة كانت موجهة لماكرون المسيء للإسلام أم للجولاني الي عم يتحالف مع الصليبيين.
‏
‏وزارة الداخلية طلعت وقالت أنه موقع الانفجار يقع خارج النطاق الأمني المخصص لمقر إقامة ماكرون، بس خرائط غوغل وأهل الشام الساكنين بالمنطقة بيعرفوا منيح أنه الانفجار وقع على بعد نحو 100 متر فقط من الفندق
‏
‏طيب إذا هي الهبدة مرقنالكن اياها كيف بدنا منرقلكن إعلانكن بأنكن كنتوا راصدين العبوات الناسفة وكنتوا عم تجهزوا لعملية التفكيك بس ما لحقتوا وانفجرت العبوات.. علما أنه فيديو انفجار العبوة الناسفة بحاوية القمامة بيثبت أنكن ماكنتوا عرفانين شي وشرطة المرور كانوا واقفين حد الحاوية من دون أي إجراءات قبل ما يفاجأهم الإنفجار
‏
‏هي صار فيكن متل يوم عنصر أمني من عندكن فجر حالوا بوفد أمريكي بتدمر، وطلعتوا قلتوا أنه كنتوا عرفانين أنه مو عالحشيشة وموقعين قرار فصله بس كمان مالحقتوا وقتا لأن فجر حاله بيوم عطلة وكان قرار فصله رح يتنفذ تاني يوم.. اول مرة بسمع بمؤسسات أمنية وعسكرية بتعطل!
‏
‏طبعاً ورغم أنه نحنا ما منعرف مين فجر بالضبط، ولا أي جهة أعلنت مسؤوليتها عن التفجيرات لحد هاللحظة، وحتى السلطة ما اتهمت حدا.. بس الحمد لله قتيبة ياسين بيعرف.. قدر يستبعد داعــ.ش من دائرة الاتهام ويبرأها من التفجيرات سلفاّ.. بتعرفوا أنتوا قتيبة خبير متفجرات واستخباراتي سابق، عدا عن البصيرة الي عنده اللهم لا حسد..

‏
‏قتيبة عم يحلل ويقول.. أنه «ببساطة» زيارة ماكرون عم توصل رسالة أنه سوريا آمنة ومستقرة، والتفجير عم يوصل رسالة معاكسة تماماً.. لهيك حسب قتيبة هدف التفجيرات هو البلبلة، وهذا يبعد وقوف تنظيم داعش خلفه ويرجح الفلول وأشباههم.. مع أنه ما عرفنا مين قصده بأشباههم إذا الهجريين او القسديين أو السنة الكيوت، بس واضح أنه الأخ مستعجل ليقول كلهم «أمجد يوسف»
‏
‏طبعا حملة التحريض ضد المكونات السورية انطلقت من اللحظات الأولى للانفجار.. وطلع أحد أنصار السلطة المدعو حسين حاج حسين وطالب بتطهير دمشق من ما سماها مستعمرات المزة وحي الورود وعش الورور وجرمانا من الفلول والهجريين ويقصد العلويين والدروز وعم يقول عنهم إرهابيين بالفطرة.. وبعدها طلع بفيديو تاني استنتج أنه عالأغلب وراها القسديين وقصدوا الأكراد لأنهم اكيد منزعجين من زيارة ماكرون.. وهون منرجع ومنعيد وين محظورات وزارة الإعلام الستة، لإيمت هالنفايات البشرية بدها تضل منتشرة على صفحات السوشال ميديا عم تحرض يمين وشمال من دون أي رادع.. أم أنه الدرب الأعوج من التور الكبير؟!
‏
‏طيب «فرقة الغرباء الفرنسيين» الي قاعدين بمخيم بحارم وعم ياكلوا قتل عالطالعة والنازلة من سلطة الجولاني، وبيعرفوا منيح أنه ماكرون بهالزيارة أكيد رح ياخد تعهد أمني من أبو محمد بإنهاء ملفن.. مانن متهمين؟!
‏
‏المقاتلين الأجانب وخاصة الأوزبك الي الهم شهرين عم ينزلوا بيانات عن الظلم الواقع عليهم من السلطة، واتهموا الجولاني بشكل مباشر أنه عم ينفذ طلبات المجتمع الدولي بالقضاء عليهم.. مانن متهمين؟!
‏
‏الدواعش.. الغاضبين عالجولاني لأن باع كل رفاق الجهاد كرمال الكرسي وتحالف مع الصليبيين، والغاضبين أكيد من ماكرون لأنه وفق تعبيراتهم أساء للإسلام والمسلمين بأكتر من مناسبة.. طيب هدول مو متهمين؟!!

‏دمشق الآمنة والمستقرة، بتكون آمنة ومستقرة لما تتنضف من خلايا التطرف والقاعدة وأشباهها الي جابن معه الجولاني عالشام..
‏
‏هنن نفسهن الي فجروا كنسية مار الياس بالدويلعة، وفجروا طريق القصر، وخبطوه لأبو محمد نفسه يوم سهرة راس السنة الماضية بس نفد بإصابة، وهالحادثة وثقها صالح الحموي القيادي السابق بجبهة النصرة، وماعم نجيب شي من عنا.. وكمان هنن الي فجروا مقهى المحامين بدمشق، وكانوا زارعين عبوات ناسفة قبل 4 أيام، وحدة أمام السفارة الأمريكية والتانية أمام السفارة الروسية كشفتها الاستخبارات الإماراتية.. وكمان هالمعلومات مو من عنا.. من لسان صالح الحموي نفسه!

‏وختامها.. السلام لدمشق.. والسلام لسوريا