‏تفجــ.يــ.ر جرمانا.. ابحث عن المستفيد!

‏فور وقوع تفجير سرفيس الركاب الدامي بمدينة جرمانا ذات الغالبية الدرزية، خرجت جوقة السلطة الإعلامية بخطاب واحد.. وكأنه أمر عمليات.. خطاب متفق عليه ومرسوم بحذافيره.. رواية هزلية مفادها أنه الدروز هنن فجروا أنفسهم!
‏
‏أبواق السلطة ربطوا الجريمة بخبث ببيان أصدروه وجهاء بجرمانا أعلنوا فيه وقوفهم بجانب وحدة «الدولة المركزية»، بمحاولة دنيئة لتغذية التناقض المفتعل والإيحاء بأنه جماعة الشيخ حكمت الهجري بالسويداء هنن المسؤولين عن تفجير إخوانهم بجرمانا انتقاماً من مواقفهم.
‏
‏شوفوا هالفهمان اللي يمكن بعمره مو فايت مدارس، طالع عم يحكيلنا عن القاعدة التحليلية.
‏
‏ابحث عن المستفيد قلتلي.. تعال لنقلك يا بتوع المدارس شو هي القاعدة التحليلية اللي أنت عم تحكي عنها؟ وكيف بتورطك إلك وبتأكد المؤكد.
‏
‏إذا بدك تمشي بهالمنطق وتتهم أنت وأبواق السلطة المكون الدرزي بتفجير نفسه، فمعنى ذلك أنه كل التفجيرات الي ضربت معاقل فصائل المعارضة والجماعات الجهادية بالغوطة وإدلب وحلب وقت كانت حركات مناوئة للدولة المركزية، فينا نقول أنه كانت من صنع أيديهن لاتهام خصومهم.. علماً أنه هي الجماعات الجهادية وقت كانت تضرب بعضها كانت تطلع وتتبنى بشكل علني اغلب التفجيرات..
‏
‏يعني هي شغلتكن.. ومو بس هيك.. تاريخ التنظيمات والفصائل الجهادية الي عم تدير السلطة اليوم هو تاريخ حافل وموثق بالعبوات الناسفة والمفخخات والأحزمة الناسفة.. يعني هيك تفجيرات ما طلعت براتكن وشغلكن واختصاصكن!
‏
‏والأضرب انه الجولاني طلع من مدة بمقابلة قال فيها أنه بحياته ما أذى مدني!.. له يا شيخ.. وتفجيرات أسواق وشوارع دمشق ب٢٠١٢ و٢٠١٣ الي راح فيها عشرات المدنيين وتبناها تنظيمك جبهة النصرة شو بتسميهن هدول.. وتفجيرات حمص وحلب.. ومجازر ريف اللاذقية، ومعان بحماة، وحطلة بدير الزور، وقلب لوزة بإدلب.. وهي طبعا جزء من تاريخ الجولاني الدموي خلال الحرب السورية.. وقال شو ما أذى مدني بحياته.
‏
‏طبعاً القضية مو محصورة بتفجير جرمانا مبارح.. يعني خلال الشهرين الي مضوا صار تفجيرات عبوات ناسفة وقت زيارة ماكرون، وتفجير مقهى قصر العدل بالحجاز، وتفجير عبوة ناسفة بحي الورود.. وتم تفكيك أكتر من عبوة ناسفة بعدة جيوب بدمشق.. فعلى هامان يا فرعون!.
‏
‏وفوق هالشي طلع تنظيم جهادي بيحمل اسم «منبر أنصار الرسول» وأعلن تبنيه للعملية بجرمانا، ومن خلال رصد منشوراته على قناته بتلغرام تبّين أنه أله أيام وشهور عم يهدد سكان جرمانا، وسمى عملية تفجير الحافلة بالانذار الثالث.. بس كل هاد ماشفتوه أو ما بدكن تشوفوه لأن في رواية جاهزة للفتنة بين الدروز!.
‏
‏والأهم كمان.. أنه من قبل نحو شهرين من مجازر السويداء السنة الماضية، اشتغلت ماكينة التحريض الطائفي وخطاب الكراهية من أنصار السلطة ضد الدروز، وبلشت تداعيات هالشي بهجمات عصحنايا والاشرفية بريف الشام، ومحاولة اقتحام جرمانا، وبعدها صارت مجازر السويداء.. ولليوم التحريض الطائفي مستمر وبوتيرة أعلى ضد الدروز.. هاد خطاب الكراهية السلطة مو شايفته ولا بتحاسب عليه ولا حتى مستعدة تصدر قانون يجرم الخطاب الطائفي، أو تقرأ التفجير على أنه من تداعيات استمرار وتصاعد موجات التحريض ضد الدروز وباقي المكونات السورية!.
‏
‏خلاصته تفجير جرمانا اجا بعد عشرين يوم من مظاهرة لدروز جرمانا بذكرى مجازر السويداء رفعوا فيها شعارات مناهضة للجولاني وسلطته، وأثارت موجة تحريض كبيرة ضدهم من أنصاره.. فليش ما تم اعتبار التفجير انتقام من دروز جرمانا على هتافاتهم ضد الجولاني بذكرى المجازر؟!.
‏
‏وخلاصته كمان أنه دماء الأبرياء بجرمانا أثبتت مرة أخرى أنه عصابات الأمس هنن سلطة اليوم، وأنه الإنذار التالت إذا بيصير مية ما رح يكسر إرادة شعب بيرفض الخنوع والاستعباد مهما بلغت دموية الجلاد.