‏القائد العظيم.. حين قام الجولاني بـ”عمل مذهل” في سوريا

‏بمناسبة وغير مناسبة بيطلع ترامب يكرر نفس الجمل بوصف الجولاني: رجل قوي.. قائد عظيم.. جذاب.. وأنه قام بعمل مذهل بسوريا
‏
‏طبعاً ودائماً بيرفق هاد الوصف بجملة: هذا الرجل الذي وضعته أنا وأردوغان!
‏
‏ما علينا.. بس أنه شو هو العمل المذهل الي قام فيه الجولاني بسوريا؟!
‏
‏الليرة عم تنهار، المحروقات نار.. فواتير الكهربا بالملايين، والفصل التعسفي والبطالة الله يعين.. 90 % من الشعب تحت خط الفقر.. مشايخ عم تحكم وزارات ومؤسسات، وإرهابي استرالي متحكم بالاقتصاد.. آخر دراسات المعيشة بتقول أنه الأسرة السورية المكونة من 5 أشخاص بدها 11 مليون مصاريف عالحاجات الأساسية بالشهر.. يعني الزيادات عالرواتب انقعوها واشربوا ميتها.. فوين العمل المذهل بالموضوع؟!
‏
‏حقول النفط والغاز والمطارات والكهربا.. الأصول الاستراتيجية كلها عم تنباع استثمارات لآل الخياط.. ومنشان ما تفكروا أنه آل الخياط جبابرة ويا لطيف شو هالقوة لحتى قدروا يستحوذوا على أهم اقتصادات سوريا.. الجماعة أول شي واجهة لقطر الي عم تقبض اليوم ثمن دعمها لجبهة النصرة وفصائل المعارضة خلال سنوات الحرب.. وتاني شي وهادا الأهم أنه جماعة الخياط عم يستثمروا بسوريا بطريقتين: الطريقة الأولى بالشراكة مع شركات أمريكية وتركية.. والطريقة التانية بالدين.. كيف يعني بالدين؟
‏
‏هاد يا سيدي، شركة باور إنترناشيونال هولدينغ القطرية المملوكة لعائلة الخياط قدمت للحصول على قرض بقيمة 7 مليار دولار من بنك «جيه بي مورغان تشيس» الأمريكي.. قرض مخصص لتمويل الاستثمارات الي حصلت عليها شركة الخياط بسوريا
‏
‏يعني بصريح العبارة.. إذا بكرا ما دفعوا بيت الخياط القرض، بيستحوذ البنك الأمريكي عالأصول الي استثمرتها الشركة القطرية بسوريا والله وأعلم.. فوين العمل المذهل الي قام فيه الجولاني؟!
‏
‏معقول أنه قال وحد البلاد.. وين التوحيد؟! السويداء خارج سلطته.. الدمج مع قسد متل مو شايفين بيمشي يوم بيوقف عشرة.. والباقي عايش تحت سلطة أمر واقع ببيئة أمنية هشة، مليانة انتهاكات وتجاوزات، وحتى مخاطر أمنية بأهم نقطة.. العاصمة دمشق.. أكيد عم تشوفوا أخبار العبوات الناسفة بكل مكان بالشام من المقاهي لمحيط الفنادق والسفارات.. والخير لقدام يا أهل حارة اللوز.. يعني حتى الجولاني نفسه مو مستقر وضعه وعايش تحت حراسة مشددة خوفاً من رفاق الجهاد السابقين الي بيعتبروه خائن!
‏
‏ولنزيدكن من الشعر بيت.. أبرز الفصائل الي اتشكل منها الجيش الجديد هي فصائل موالية لتركيا بالمطلق متل الحمزات والعمشات وتوابعن والي تحولت تسمياتن بعد سقوط النظام لفرق عسكرية مرقمة.. يعني الإدارة العسكرية عملياً بإيد هاكان فيدان.. والي بإيده العسكر بإيده السياسة.. فوين العمل المذهل للجولاني بالموضوع؟!
‏
‏وقريباً رح نعرضلكم مادة بالأدلة والوثائق عن الي عم يعملوا التفجيرات بدمشق ومين جهاز الاستخبارات الي وراها.. وشو دور التركي تحديداً بهاد الموضوع، منشان ما تضلوا تتساءلوا وتتهموا الفلول والقسديين والهجريين!
‏
‏النتيجة.. أنه لما ترامب بيقعد يتغزل بالجولاني الي عم يبيع أغلب أصول البلد السيادية لقطر بواجهتها عائلة الخياط.. وقتا منعرف أكتر قديش اندفع مال قطري لتبييض صورة الجولاني بأمريكا والغرب، ومنعرف ليش عائلة الخياط بالذات كانوا عم يركضوا بإيديهن ورجليهن ليرفعوا العقوبات عن سوريا.. ومتل ما بقولوا: كلشي بتمنه
‏
‏وقال شو الجولاني قام بعمل مذهل.. وع قد ما منسمع أنه أبو محمد عمك وعم الجميع وقائد عظيم، وهو بسجله ما في انتصار واحد قد ماحكا عن حاله، وقد ما حكا ترامب..لأن عأرض الواقع ما في أي إنجاز.. وإذا إسقاط نظام الأسد كان إنجاز فكتار صاروا بيعرفوا مين أسقطه.. وفيكن ترجعوا بحلقاتنا السابقة لتعرفوا اكتر مين أسقط وكيف تم إسقاط بشار الأسد!
‏
‏
‏بالنهاية ولحد اليوم لا شركة شيفرون نزلت عسوريا اشتغلت ولا غيرها.. لأنه ما في بيئة آمنة ولا رح يكون في بيئة آمنة، لأنو هدول الجماعة الي بالحكم ومتكل عليهن ترامب وغيره عبارة عن شرذمة وعصابة، ومارح يصيروا رجال دولة مهما بخّلهن ترامب عطر، ولو إجا ماكرون عسوريا مية مرة، مارح يصيروا رجال دولة.. هدول باختصار طبقة ملفوظة شعبياً!
‏
‏طبعاً بعد ما تنزل هي الحلقة رح انرحب بالذباب الإلكتروني يلي رح يجي ع هاد الفيديو يلي عم انجهزلن تقرير مرتب كمان.. وناطرين انشوف العينة التابعة لهي الشرذمة الحاكمة بعد ما تنزل الحلقة.. والسلام لسوريا