‏مجلس الشعب.. شعب مفصّل ع ذوق المعلم!

‏في مثل شعبي بيقول: دق المي وهيي مي!.
‏
‏عأيام النظام السابق كان مجلس الشعب عبارة عن مسرحية انتخابية وتزوير وبطيخ.
‏
‏عأيام أبو محمد.. الحمدلله التغت المسرحية الانتخابية والتزوير.. والزلمة هيك دجّنا اياها دجّ وقال ما في داعي أعمل مسرحية انتخابية، رح اعطيكن اياها من الآخر.. أنا بعيّن مجلس الشعب.. مو منشان شي بس لأن هالزعبرات الديمقراطية بدعة غربية وشرك والعياذ بالله!.
‏
‏خلاصته هي صار عندكن مجلس شعب جديد.. بس بدون شعب.. أو بالأحرى شعب مفصّل ع ذوق المعلم!.
‏
‏أنتوا بتسمعوا «مجلس شعب» بيخطر ببالكن صناديق اقتراع، مرشحين عم يركضوا ورا الأصوات، برامج انتخابية، أو حتى مرشحين عم يشتروا الأصوات، ومواطن عم يصفّ عالدور ليعطي صوته.. بس لا.. هون القصة غير!.
‏
‏بسوريا الجولاني حفلة الانتخابات صارت عالضيق.. ما في معازيم.. أبو محمد عيّن لجنة اختارت ثلثي أعضاء المجلس.. وهو اتكفل بالثلث الباقي مباشرة بلا لجنة بلا بطيخ.. عيّنه هو شخصياً بمرسوم ملكي.. عفواً بمرسوم رئاسي! .
‏
‏بس ييييي شو طلع مانو جولاني وفري وبيحب الترند كعادته.. وعيّن ممثلة سافرة والعياذ بالله عضوة بمجلس الشعب.. وهلق جماعته تركوا كل المجلس وقاعدين عم ياخدوا الناس لهالمطرح.. مطرح ما بدها تقعد الفنانة روزينا لاذقاني.. وقاعدين عم يقارنوا ظهورها اللافت مستقبلاً بالمجلس بظهور محمد قبنض السابق.. طيب ممكن تقارنولنا بين ظهور حسن الدغيم وخالد العبود مثلاً!.
‏
‏بس شو مجلس شعب.. لا وجع راس انتخابات، لا وجع راس ديمقراطية، ولا حتى وجع راس رأي عام.. مجلس عبارة عن كومبارس مفلتر، قاعدين تحت القبة مو ليشرعوا بل ليقولوا «آمين» على كل مرسوم بيطلع من مطبخ القصر!.
‏
‏المصيبة مو بس بالتعيين، المصيبة بالاستخفاف بعقول السوريين.. عم يقولوا لما أعلنوا عن تعيين الجولاني للسبعين عضو أنه «استكمال المجلس»، وهو فعلياً استكمال الهيمنة.. المجلس اللي لازم يكون صوت الناس المقهورة وأبرز إنجازات «الثورة» عأساس لحتى يقولوا للعالم ليكو هي أول تحول من الديكتاتورية للديمقراطية.. تحول لنادي مغلق لخدمة أجندة جهة واحدة.. جهة الجولاني.. الي كانوا كل المعارضين لبشار الأسد بيشوفوه متل ماكانوا يشوفوه الأسد وكل حكومات العالم.. إرهابي.. فمعقول المقدمات الخاطئة تعطي نتائج صحيحة؟!.
‏
‏وبالنهاية.. نصيحة للمجلس الجديد: لا تتعبوا حالكم بكتابة قوانين، ولا تضيعوا وقتكم بمناقشات.. وفروا الحبر، وفروا الكهربا ووفروا حتى التصفيق وخليكن عالصامت لأن دوركم محجوز أصلاً لقرارات جاهزة.. وتحياتي يا شعب مجلس الشعب!.