‏القضية أكبر من بتول علوش!

بالساحل السوري صار الخوف معشش بقلوب أبناء الطائفة العلوية.. خايفين من كلمة.. من موقف.. من نسبهم الديني والطيني.. لك حتى صاروا يخافوا يحكوا بلهجتهم
‏
‏من لما سيطرت هيئة تحرير الشام عالحكم بدمشق، صار عند قسم كبير من العلويين إحساس إنهم خسروا الأمان بالكامل..
‏
‏قصة بتول علوش ما انفجرت لأن بنت اختفت وبس..
‏القصة انفجرت لأن السوريين شافوا شي أكبر من حادثة فردية
‏
‏شافوا صورة بلد عم يتغيّر بسرعة وعم يطلع منه وجه مرعب.. فيديوهات أهل بتول كانت صادمة.. أب عم يحكي كيف شاف بنته بعد اختفاء لمدة أسبوع وكأنها «روبوت».. أم عم تبكي وهي مقتنعة إنه بنتها «مسبية»
‏
‏وبين الروايات المتضاربة كان في سؤال أكبر من بتول نفسها: ليش كل هالخوف؟ وليش أي بنت علوية بتختفي الناس فوراً بتفترض إنها خُطفت؟
‏
‏الجواب مو ببتول وحدها.. الجواب بمناخ كامل عم ينشغل عليه من لما وصل الجولاني للحكم..
‏
منابر دينية متطرفة عم تحكي عن «هداية العلويات» وتكفير العلويين وإهانة كرامتهم.. شيوخ سلطة عم يفتوا بأنه البنت الي بتغير معتقدها من المذهب العلوي للمذهب السني ما لازم ينسمح بإعادتها لأهلها.. وعنصر أمني اليوم مرابط على دوار الأزهري اليوم بسلاحه وعم يهدد أي علوي بيعمل اعتصام تضامني مع بتول عند الدوار بالقتل.. وكمان تسجيلات صوتية جديدة عم تتوعد العلويين بالإبادة الشاملة إذا بيفكروا بأي احتجاج ضد السلطة.. تسجيلات قال فيها أحدهم أنه «مجازر آذار مجرد بداية فقط»
‏
‏ومع كل حادثة اختفاء بنت علوية في شريحة متطرفين من أنصار السلطة بتطلع تهين كرامة العلويين عبر وسائل التواصل بأنه أنتوا مباحين وحلال قتلكم وسبي نساءكم وأنه أنتوا كفار.. وأنه شيخنا ابن تيمية علمنا كيف نتعامل معكن لهيك «بالذبح جئناكم»
‏
‏بلد مليان سلاح ومليان موتورين ومليان جماعات متشددة بعدها شايفة المكونات الدينية غير السنية غنائم حرب
‏
‏وأي اعتراض علوي صار عم تواجهه هي الشريحة المتشددة فوراً باتهامات جاهزة متل فلول وشبيحة وضد الدولة الجديدة.. وما خليتوا الرئيس يتهنى بحكمه!
‏
‏اليوم بالساحل في أهالي صاروا يخافوا على بناتهم من الجامعة ومن السفر.. وحتى من استخدام الموبايل
‏
‏وبقلب الخطر برز اسم مؤسسة دينية غامضة بالساحل اسمها «دار الأخوات» تابعة لمؤسسة «الذهبي» الدعوية المتطرفة وفق المعطيات المتداولة.. دار محاطة بالسرية وبحراسة مشددة عم تستقطب الفتيات العلويات سواء بالتضليل وغسيل الدماغ أو بالترهيب والإكراه..
‏
‏دار غامضة مو معروف مين بيديرها ومين بيراقبها وشو الوضع القانوني إلها وللبنات الي عم يتم سحبن من أهاليهن عليها!
‏
‏وطبعاً.. كل مرة بتختفي بنت بترجع نفس الرواية أنه أسلمت بإرادتها واختارت طريقها ولا تتدخلوا بحريتها
‏
‏بس السوريين بيعرفوا شغلة مهمة.. أنه الحرية ما بتكون تحت الخوف وساطور التطرف والتكفير
‏
والإنسان الحر ما بينقطع فجأة عن أهله وبينعزل وبينحط تحت حماية أمنية ودينية
‏
‏المفارقة إنه ناس كتير دافعت عن الموضوع تحت عنوان حرية المعتقد.. وهالشي صحيح لو السلطة وجمهورها الموالي إلها بيآمن بحرية المعتقد..
‏
يعني لو انعكست الصورة.. لو بنت من الطائفة السنية راحت لعند شيخ درزي مثلاً وغيرت دينها والدروز رفضوا يرجعوها.. هل كانوا أهل السلطة والتطرف رح يحكوا بنفس البرود؟ هل رح يقولوا انه اختارت طريقها ولا حدا يتدخل بحريتها؟ أو رح يعملوا فزعة عالسويدا ويدبحوها هيي وكل مين بيحامى عنها.. وكل مين بيطلع بطريقن؟!
‏
‏الموضوع مو حرية شخصية متل ما عم ينقال.. الموضوع متعلق بمن يملك القوة، ومن يملك حق تعريف الضحية..
‏
‏بسوريا الجديدة ما في قانون.. ولا تحقيقات شفافة ولا محاسبة للتحريض الطائفي.. والنتيجة إنه العلويين صاروا يعيشوا إحساس الإهانة اليومية.. إهانة إنك متهم دائماً بانتماءك وعقيدتك وطريقة حياتك.. إهانة إنه بنت مختفية من طائفتك تتحول لساحة مزايدات دينية وسياسية
‏
‏لهيك حتى لو رجعت بتول علوش اليوم لعيلتها.. فالقصة ما انتهت.. لأن القضية ما عادت قضية بنت واحدة.. ولا قضية البنات العلويات الي ثبت أنه معظم الي انفقدوا منهم كانوا مخطوفات.. القضية صارت قضية وجود وكرامة طائفة كاملة.. هي الطائفة العلوية!