‏أترع الكــ.اس يا أبو محمد.. «حزب الويســ.كي» يحصد الأغلبية في دمشق!

«سكرجية البلد يطالبون بحرية العربدة»!
‏
‏«حزب الويسكي يخرج في مظاهرة»
‏
‏«بقايا الأسدية انزعجت من منع الكحول»
‏
‏هيك بلشت حملة الشتائم والتخوين والتسخيف المنظمة من أنصار سلطة الجولاني ومطبليها ضد مظاهرة باب توما مبارح
‏
‏المطبل رقم واحد قتيبة ياسين كتب عم يتمسخر عالمظاهرة وقال: لا للتمييز على أساس كبتاغوني!
‏
‏المطبل رقم تنين أحمد العقدة كتب عنها وقال: «وقفة الويسكي كان ناقصها قنينة»
‏
‏المطبل رقم تلاتة قصي ابو يوسف الصحفي بجريدة الثورة وصف المتظاهرين بـ«السكرجية»!
‏
‏قناة الاخبارية التابعة للسلطة وصفت المظاهرة بأنها خرجت رفضاً لقرار «المشروبات الروحية»
‏
‏كلن بنفس القالب.. نفس السخرية.. ونفس محاولة التسخيف.. كأنه في نص مكتوب وكل الجوقة عم تقرأ منه
‏
‏بس يا ترى ليش كل هالجهد لتصويرها مظاهرة كحول؟!
‏
‏معقول إذا اعترفت إنها مظاهرة حقوق.. بتخاف تسقط سلطتك؟!
‏
‏الناس طلعت تقول: لا للوصاية على حياتنا الخاصة.. لا لقرارات عم تقسم المجتمع طائفياً
‏
‏رد السلطة وجماعتها إجا سريع ومنسّق.. ووسخ متل العادة!
‏
‏ما ناقشوا جوهر الاعتصام، لأنهم بيعرفوا قديش خطير..
‏بدل هيك حولوه لنكتة رخيصة عن «الويسكي»
‏
‏هيك بتنطبخ المعارك بعقل المطبلين: اختصر القضية.. شوّه مطالب الناس.. وبعدين ضحّك جمهورك
‏
‏وفوق منها، اليوم طلّعوا مظاهرة مضادة بالعباسيين.. شي خمسين واحد عم يهتفوا كمان «مابدنا سكرجية».. يعني نفس الاسلوب الساقط!
‏
‏بس الحقيقة أبسط وأخطر.. المعركة مو على كاس.. المعركة على كرامة!
‏
‏المفارقة اللي خربطت عقولهم إنه اللي طلعوا بباب توما مو «أقلية بدها كحول» وإنما خليط دمشقي واسع وفيهم مسلمين قبل غيرهم.. لهيك استلموا كمان المحجبات الي ظهروا بالاعتصام وكالعادة تشويه سمعة وافتراء وقذارة بتطلع من تمن صرنا كلنا منعرفها
‏
‏أبواق السلطة اشتغلت كأنها غرفة عمليات وحدة: نفس الحكي وبنفس التوقيت ونفس الهدف.. هي مو صدفة.. هي إدارة أزمة!
‏
‏سلطة بتفشل بالحكم فبتحرك التحريض.. وكل ما ضاقت فيها الدني بتفتح ملف طائفي وبتشعل معركة وهمية لتغطي على قضايا أهم رح تجيب آخرتها!
‏
‏المشهد بباب توما مبارح كشف عن شي تاني مهم.. وجود الدمشقيين من كل المكونات بالاعتصام كشف عن فشل نموذج «أدلبة» دمشق، رغم كل الكوادر السلفية المتشددة والأجهزة والخطابات التعبوية المتطرفة الي نقلها الجولاني من إدلب للشام
‏
‏حسابات أبو محمد طلعت خاطئة، وعجز عن استنساخ تجربة إدلب بدمشق العريقة الحضارية المتعددة المتعايشة بكل مكوناتها
‏
‏مظاهرة باب توما ما كانت حدث عابر.. كانت إنذار مبكر لاتساع الهوة بين سلطة بدها تفرض نمط واحد متشدد، وشارع رافض لهي الهوية.
‏
‏الشعارات ما كانت ضد قرار.. كانت ضد عقلية الوصاية كلها.. وهون الخوف الحقيقي عند السلطة.. لأنك إذا ناقشت قرار بتتحاصر، بس إذا رفضت المنطق كله بتصير خطر.. لهيك لازم يشوّهوك.. تحويلك لـ«سكرجي» أسهل
‏من الاعتراف إنك مواطن عم يطالب بحقه
‏
‏بالنهاية.. أنتوا كسلطة صرتوا مكشوفين وكل مرة عم تتهجموا على مكون وتلعبوا عالوتر الطائفي وتشدوا العصب السني.. لحتى حرقتوا أوراقكم كلها مع الي بتسمون أقليات وهلا بلشتوا تصطدموا مع المكون السني تحديداً من دير الزور للرقة لحلب وصولاً للشام ودرعا.. ونحنا وأنتوا شايفين كيف الغضب عم يتوسع ويتصاعد.. يعني باختصار أنتوا عم تلعبوا بعداد عمركن.. ونهايتكن مو مطولة.. والأيام جاية!