‏إفطار في القصر.. بوفيه الأسئلة المجهولة والأجوبة المعدومة!

ساعتين و 19 دقيقة.. إفطار ملكي بقصر الشعب، ما منعرف إذا اقتصر عالصمون والزعتر والشاي!
‏
‏لقاء بين الجولاني ومجموعة «إعلاميين».. أو خلينا نكون أدق ونقول تيكتوكرز السلطة، أصحاب الفلاتر العالية والنفوس الواطية!
‏
‏موسى العمر خبرنا عن مدة اللقاء بالدقيقة والثانية، بس ما خبرنا عن جواب واحد
‏
‏هادي العبدالله طلع ساعة يحكيلنا عن الإيجابية والانفتاح والشفافية، وكيف جاوب فخامته وسعادته وسيادته وجلالته على أسئلتهم.. بس عيبكن عاللي عرف سؤال واحد محدد وجواب واحد بس «يشفي صدور قومٍ مؤمنين»
‏
‏لا سؤال محدد، ولا جواب موثق، ولا رقم واحد، ولا جدول زمني، ولا خطة حلول، ولااااشي.. مجرد حديث خشبي ما بينفع لإعلان شامبو حتى ينفع لإدارة دولة
‏
‏صورة الاجتماع بقصر الشعب انتشرت.. عشرات الرجال وامرأة وحدة.. يعني هي الصورة بحد ذاتها عبرة.. أنه كيف إجا من قلبكن تستقبلوا «عورة» من عورات المجتمع (بسخرية).. معقول تكونوا خليتوها تجيب معها محرم؟!
‏
‏برا.. الناس واقفة ع طوابير الغاز.. وبالقصر نقاشات عن المرحلة والتحديات والإرث الثقيل
‏
‏بالشارع.. عجوز عم يبكي لأن مو قادر يدفع فاتورة الكهربا.. وبالقصر ابتسامات عريضة مع فخامته!
‏
‏بيقولوا إنهم سألوه عن كل شي.. منيح.. طيب سألتوه عن خطة إنقاذ اقتصادية واضحة؟ عن سعر الصرف؟
‏عن البطالة؟ عن الاستثمارات؟ عن القضاء؟ عن المعتقلين؟ عن جدول زمني للإصلاح؟
‏والا أقصى سؤال كان: سيادة الرئيس كيف شايف المستقبل؟!
‏
‏اللقاء بحد ذاته مو هو المشكلة.. المشكلة إنه ينحصر شعب كامل بشلة مطبلجية، وينحصر الإعلام بكم تيكتوكرز اختصاص تلميع!
‏
‏يعني يا أبو محمد، وقت بدك تخاطب الشعب فيك تخاطبه مباشرة بأرقام واضحة وقرارات ووعود حقيقية مو أوهام.. تخاطبه مباشرة مو من خلال طبقة عازلة من المطبلين!
‏
‏بالنهاية منحب نخبرك.. أنه الشعب الي عم تتهرب من مواجهته بالحقائق رح تشوف وتسمع مطالبه بالشارع عما قريب.. وأكيد أنك شايف الجمر الي تحت الرماد الي بلش باحتجاجات متفرقة وممكن بأي لحظة يتحول لاجتياح جماعي للشوارع.. وما على الرسول إلا البلاغ.