من فاتورة الكهرباء إلى سكة حلب.. كيف تتعامل سلطة الجولاني مع أي صوت معترض؟

‏بسوريا الجولاني الاعتراض على فاتورة كهربا ممكن يتحوّل لتهمة سياسية، والمواطن العادي ممكن يصير «مشبوه» بس لأنو تجرأ وفتح تمّه.
‏
‏اللي صار مع رجل دمشقي بعد ما اعترض علناً على فواتير الكهربا مو حادثة عابرة، هاد نموذج فاضح لعقلية سلطة ما بتتحمّل أي صوت خارج سربها.
‏
‏خلال ساعات اشتغلت آلة التشبيح.. تخوين، تسفيه، واتهام بالحنين للنظام السابق، وشيطنة علنية على ألسنة إعلاميي السلطة وشلّة البلوغرز.. هادي العبد الله طلع بفيديو خاص كرمال يتهم الزلمة بأنه «حانن» لنظام الأسد.. غيرو وصف المحتجين بـ«الجوعانين»، وطالب بمعرفة اسم الزلمة ليشنّوا حملة تشهير منظمة ضده.. هيك عم تندار «التقريباً دولة».. منصات تحريض بتتحرك بعد تنسيق على مجموعة خاصة بالشبيحة الجدد عالواتس، بيبلغوا بعض بالمجموعة عن أي حدا منتقد السلطة وبيروحوا على منصاتن وصفحاتن ليحطوه على «سكة حلب» حسب التوصيف السوري الدارج.
‏
‏نحنا كمنصة إعلامية مو محايدين.. خلافنا مع سلطة الجولاني سياسي وجذري، ومنشوفها سلطة متطرفة إلها سجل إرهابي واضح.. ومنعرف مسبقاً إنو التهم إلنا جاهزة: فلول وقسديين وهجريين وأدوات خارجية.. بس السؤال يلي بيفضحكن: شو ذنب هالمواطن الي ما معه حق ربطة خبز لحتى يكون معه حق فاتورة كهربا مليونية وفوق منها لمجرد أنه صرخ خونتوه؟ شو ذنب المعلّم بإدلب الي راتبه ما بكفيه أجار طريق، والمعلم بالساحل الي بدكن تنقلوه قسراً ع محافظات بعيدة براتب أضرب لسا من راتب معلمين إدلب وإلا بتفصلوه..
‏شو ذنب بياعين البسطات بحلب الي قطعتوا أرزاقهم من دون بديل.. والموظفين والعمال الي عم تفصلوهم بالساحل وبالقنيطرة كمان.
‏
‏لغة فوقية عم يستخدمها أنصار السلطة على قاعدة «نحنا حررناكن»، مع نغمة جديدة كمان مستوردة من العهد السابق أنه «نحنا مع المطالب المحقة بس الرئيس خط أحمر»..
‏
‏المدن عم تغلي والاحتجاجات اليوم عم تمتد من دمشق لإدلب، ومن الساحل لحلب، ومن القنيطرة للسويداء.. معلمين مضربين بإدلب، أصحاب بسطات متظاهرين بحلب، موظفين مفصولين بالساحل عم يحتجوا قدام التربية والمرفأ، ومظاهرات بالشام بسبب فواتير الكهربا.. وبمحردة المسيحيين طلعوا باحتجاجات بعد مقتل صايغ دهب على أيد ملثمين.. واكيد صرتو بتعرفو مين الملثمين، ومن قلب كنيسة الزيتون طلعت من كم يوم صرخة استغاثة.. شباب مسيحيين رفعوا يافطات كتبوا عليها: ساعدونا.. افتحوا باب الهجرة!
‏
‏حتى جوّا السلطة نفسها بلشت الاعترافات تطلع ولو متأخرة.. وزير الاقتصاد نضال الشعار انتقد علناً الخطاب المتفائل الوهمي، وربط أي أمل بالتحسن بصفقات «نضيفة وشفافة» وقال حرفياً أنها لسا ما توفرت، يعني عم يقولها بالمشرمحي كل الصفقات والعقود الضخمة الي طبلنالا وزمرنالا وهمية وحقها نص فرنك!
‏
‏اللي عم يصير اليوم نتيجة طبيعية لسلطة بتكمّم الأفواه وبتشيطن الفقراء لمجرد أنهم صرخوا من الوجع..
‏
‏لما تنندفن مطالب الناس تحت ركام التهم الجاهزة، الغضب بيصير قدر.. والإنذار واضح: يلي بيجرّم الاعتراض رح يحصد الانفجار.