‏الجولاني وأبو علي بوتين.. و”الأرض المباركة”!

من عدو متهم بقتل السوريين لصاحب دور تاريخي بوحدة واستقرار سوريا.
‏
‏هيك وبجملة وحدة الجولاني قلب الخطاب 180 درجة.. بعد ما كان من كم سنة يحط روسيا بقفص الاتهام، صار اليوم عم يحكي عنها كأنها الضامن والمخلّص.. والأضرب أنه وصف الأرض الروسية بـ«الأرض المباركة».. يا شحارك يا أبو محمد من أخوتك بالجهاد على هالهفوة المتنافية مع العقيدة السلفية!.
‏
‏أبو محمد اللي كان يعتبر التدخل الروسي بسوريا احتلال وقصف وقتل، صار يشيد بـ«الدور التاريخي» للروس.
‏
‏وين صارت روسيا الي حسب قاموسكن الثوري والجهادي كانت تقصف السنّة بسوريا وتستهدف المشافي والأسواق ومخيمات النازحين؟! روسيا الي عأساس دمرت حلب والغوطة وإدلب؟! كيف غفرتوا للروس بهالسرعة؟!.
‏
‏هيك فجأة صار أبو علي بوتين «شريك بالاستقرار» وتحول من مجرم لضامن، ومن متهم لوسيط، ومن عدو لحليف!.
‏
‏شكلها الذاكرة السورية بتصير قصيرة لما يكون في سلطة بالنص ولهاث للحصول على شرعية ودعم خارجي.. وذاكرة طويلة حقودة لما بيتعلق الأمر بأهل البلد!.
‏
‏في مقطع معروف للمطبلاتي موسى العمر قبل سقوط نظام الأسد بيقول فيه إنه «كل من يتعامل مع روسيا ما هو إلا عميل».. أي أخ موسى شو قولك هلق؟! بتسترجي تطلع تقول نفس الكلام اليوم؟! أو رح تتحفنا بألف مبرر عن المرحلة والواقعية ومصالح الدولة العليا!.
‏
‏مطبلاتية السلطة ماعندهم قناعات ليغيروها أساساً.. عندهم تعليمات بس.. والبوصلة مو أخلاقية.. البوصلة حيث تقف السلطة.. بس عادي المطبلين يتلونوا ويتغيروا طالما الدرب الأعوج من التور الكبير!.