‏هذه قراءتنا لتقرير واشنطن بوست حول ملف السويداء

‏التقرير اللي نُشرته صحيفة واشنطن بوست عن “التدخل الإسرائيلي بسوريا” ما كان خبر عادي، بل طلع بتوقيت حساس وبسياق سياسي فتح الباب أمام أسئلة كبيرة عن أهدافه، مصادره، والدور اللي مُراد يأديه بالملف السوري.

‏التقرير ركّز بشكل واضح على محافظة السويداء وعلاقة إسرائيل بالدروز، وحكى عن تمويل وتسليح وتدريب، وقدّم رواية جاهزة تناقلتها وسائل إعلام عربية محلية موالية لسلطة الجولاني بدون تمحيص أو تحقق.

‏تقرير واشنطن بوست مبني تقريباً على عبارات فضفاضة متل: مصدر إسرائيلي مطلع، مصدر أمني رفيع، مصدر حكومي، بدون ما يذكر أي مصدر واضح أو موثق.. وهالشي بيشكل خلل مهني كبير لتقرير مفروض يكون استقصائي.

‏التقرير بيحكي إنه إسرائيل عم تدفع رواتب لمقاتلين دروز ضمن “الحرس الوطني” بالسويداء، بقيمة 100 دولار للمقاتل بالشهر.. هالرقم وبغض النظر عن مصداقيته بس بيفتح باب المقارنة مع الدعم الإسرائيلي الي كان لفصائل المعارضة بالجنوب قبل سقوط نظام الأسد

‏بهديك الفترة إسرائيل دعمت بشكل سري مجموعة من الفصائل بسوريا، خصوصاً بدرعا والقنيطرة، ضمن استراتيجية لإنشاء «منطقة عازلة» على طول الحدود.

‏حسب تحقيقات لمجلة “فورين بوليسي وتايمز أوف إسرائيل” الدعم شمل 12 فصيل مسلح وتضمن أسلحة، معدات، مساعدات لوجستية وطبية، ورواتب شهرية لكل مقاتل بلغت 75 دولار

‏أهم الفصائل اللي استفادت من هالدعم: فرقة أحرار نوى بدرعا، لواء سيف الشام، فرسان الجولان وجيش أبابيل

‏وجبهة أنصار الإسلام

‏هالدعم كان هدفه منع انتشار القوات الإيرانية وحزب الله قرب الحدود، وضمان إنو دمشق ما تسيطر على كامل المنطقة الجنوبية

‏المفارقة إنو الفرق بين رواتب الأمس ورواتب اليوم ما بيتجاوز 25 دولار.. يعني مو مستاهل كل هالحسد من أنصار الجولاني، الي كانوا يقبضوا بس 75 دولار!

‏تقرير واشنطن بوست ما وقف عند هالوقائع، بل غرق بروايات صعبة التصديق، متل إنو الشيخ حكمت الهجري بعت “مخططات دولة درزية” بتمتد من ساحل الشوف لحدود العراق، أو إنو إسرائيل نقلت أسلحة صادرتها من حزب الله وحماس للسويداء، أو إنها عم تشرف على تدريب مقاتلين دروز بمناطق سيطرة قسد.. هالادعاءات بدون أي دليل بتضعف التقرير أكتر ما بتقويه.

‏كاتب هالتقرير اتبين انه صحفي جديد بواشنطن بوست، أمريكي من أصل ياباني اسمه (غيري شيه)، أظهر بحث معمق لأحد التقارير الإعلامية أنه صحفي يساري وعنده شبكة أصدقاء من اليهود الليبراليين الأمريكيين من جماعة “woke” الي كانوا بمفارقة عجيبة ضمن جماعة اللوبي القطري/الإخواني بأمريكا خلال العقد الأخير.

‏ومن المعروف أيضاً أنه قطر بتمتلك جزء كبير من أسهم واشنطن بوست وهيي أكبر مموليها حالياً.

‏وكان اللافت سرعة وسائل الإعلام العربية، متل الجزيرة والعربية وتلفزيون سوريا، بتلقف التقرير بسرعة.. عملوا تحليلات واستضافوا شخصيات محسوبة على سلطة الأمر الواقع بدمشق خلال ساعات، بينما تجاهلوا موضوع حساس: التنازل الرسمي عن هضبة الجولان وحذفها من الخريطة السورية الرسمية.

‏بس لو فرضنا أنه التقرير دقيق وصحيح بكل ما فيه، منلاحظ أنه تحدث عن مشروع سياسي – عسكري واسع قائم على شراكة غير معلنة بين قوى السويداء وقوات سوريا الديمقراطية قسد بدعم إسرائيلي وأمريكي.

‏هاد المشروع بيضرب فكرة الدولة المركزية الي عم تحاول سلطة الجولاني تثبتها وما عم تزبط معها، وبيوجه رسالة واضحة لهي السلطة بتقول: يا بتقبلوا الواقع وبتدخلوا بدولة لا مركزية، أو بتضلوا حكام على دمشق بس، من دون سيادة كاملة، بينما الشمال والجنوب عم ينداروا برا سلطتكم!.