‏من نيويورك تايمز إلى يوحنا العاشر.. سلام لمن يريد السلام!

‏هاد مو تقرير عادي
‏
‏هاد ملف اتهام موثق
‏
‏من داخل وحدة من أهم الصحف العالمية، تحقيق استقصائي لصحيفة نيويورك تايمز بيكشف كيف تحوّلت سوريا تحت سلطة الجولاني إلى بيئة خصبة لجرائم خطف ممنهج ضد النساء العلويات.. عمليات خطف وصفتها الصحيفة بأنها «أكثر شيوعاً وأكثر وحشية مما اعترفت به الحكومة»!
‏
‏التحقيق بيقدّم سرد تفصيلي قائم على مقابلات مباشرة مع ضحايا وعائلات وعاملين بالمجالين الطبي والإغاثي.. وبيوثق 13 حالة خطف مؤكدة، بينهم حالات تعرضت للاغتصاب
‏
‏أحد عائلات الضحايا دفعت 17 ألف دولار فدية، وقدّمت توثيقات بالرسائل وإيصالات التحويل، ومع هيك بنتهم ما رجعت..
‏
‏حالة تانية موثقة عن خطف بنت عمرها 16 سنة.. وبعد 100 يوم من اختطافها ودفع الفدية رجعت وتبين أنها تعرضت لاعتداء جنسي متكرر وكشف التقرير الطبي إنها حامل!
‏
‏الوقائع الي قدمتها الصحيفة ما انبنت على روايات ضعيفة، بل على تقاطعات مع أدلة، متل منشورات وقت الاختفاء ورسائل فدية وإيصالات تحويل وشهادات طبية بعد الإفراج.
‏
‏بالمقابل، إجا رد السلطة لنيويورك تايمز عبر نور الدين البابا برفض الاعتراف بنتائج تحقيق الصحيفة، وشكك بالأدلة نفسها، وزعم إنه رسائل الفدية ممكن تكون مفبركة.. وكرر أكاذيب السلطة القديمة بتحويل عمليات الخطف لحالات دعارة وهروب مع عشاق أو مشاكل عائلية
‏
‏هون بالضبط بتظهر الفجوة بين تحقيق دولي عم يوثّق الانتهاكات، مقابل رواية سلطة عم ترجع تجرّم الضحية نفسها
‏
‏شهادات الضحايا للصحيفة بتقول إنه بعض عمليات الخطف صارت من الشارع مباشرة أمام البيوت، على إيد مسلحين بعضهم سوريين وبعضهم جهاديين أجانب.. بالإضافة إلى أنه الخاطفين استخدموا خطاب طائفي واضح، واعتبروا العلويات «مباحات»..
‏
‏هاد مو انحراف فردي.. هاد انعكاس لعقيدة متطرفة وجدت لنفسها مساحة تحت مظلة سلطة من نفس العقيدة!
‏
‏لما راحت العائلات تبلّغ.. النتيجة كانت إهمال أو اتهام للضحايا أو طلب صريح منهم بإنهم يغيروا شهادتهم ويطلعوا ويقولوا ما كنا مخطوفين
‏
‏هون ما عم نحكي عن تقصير… عم نحكي عن إعادة إنتاج الجريمة داخل مؤسسات مفروض تحمي الناس
‏
‏وبالوقت الي عم تنكشف فيه جرائم السلطة وإرهابييها الجهاديين بيظهر أحمد زيدان مستشار الجولاني بزيارة للبطريرك يوحنا العاشر تحت عنوان «السلم الأهلي»!
‏
‏أي سلم عم تحكوا عنه يا صاحب الغبطة وتقارير دولية عم توثّق خطف ممنهج لنساء بدافع طائفي أولاً؟ أي سلم اهلي وإرهابيين السلطة من كم يوم كانوا ع وشك يرتكبوا مدبحة بالسقيلبية
‏
‏يا صاحب الغبطة.. استقبال ممثل السلطة الارهابية مو تفصيل بروتوكولي.. هاد موقف بينقرأ بالشارع وبينفهم كأنو منح شرعية.. لما عم تفتح بابك لهيك جماعة عم تفتح معها غطاء سياسي للجماعة نفسها الي طلعت مظاهرات وقالت عن الرعايا المسيحيين بأنهم سكارى!
‏
‏فيك تعرف مزاج الشعب المسيحي من التعليقات عالزيارة.. قسم من رعاياك اتهموك بأنك عم توقّع على دمهم.. وقسم قال أنك عم تبيع ضمير الرعية وتحتضن الجلاد؟
‏
‏في واحد سأل.. ليش ما شاف صليب على صدرك وقت استقبال زيدان؟ من شو خجلان؟ أو من شو خايف؟
‏
‏يا صاحب الغبطة.. لا تضطرونا نفضح ونحكي عن التمويل القطري ولوين عم يروح لحتى اتعوموا هدول الإرهابيين.. وبالختام سلام لمن يريد السلام وليس لمن يدّعيه!