دفاتر الـجولاني السوداء.. الوجه الآخر لمن يفتح الدفاتر القديمة!

بيقولوا: «نصف الحقيقة.. هو كذبة كاملة»
‏
‏اليوم بوقت عم تفتح فيه سلطة الجولاني دفاتر نظام الاسد القديمة، وعم تعيد تدوير فيديوهات الانتهاكات بس لتشعل الشارع وتشغل الناس عن فشل معيشي واقتصادي أرهق البلاد والعباد.. هون لازم نكمل بسلسلة إظهار الحقيقة المنسية من الحرب السورية.
‏
‏بينما عم يحاول الجولاني يستثمر بمآسي السوريين، ويستخدم ملفات حقوقية متل قضية أمجد يوسف وفيديوهات مشفى تشرين العسكري ليشتت الغضب الشعبي اللي بلش يتصاعد ضده، عم ينسى أو يتناسى إنه إيده ومنظومته المتطرفة غرقانة بدم السوريين للركب.
‏
‏خلونا نبلش من هون من دير الزور.. قبل 12 سنة كانت جبهة النصرة عم ترسم مشروعها بالرصاص.. بهي المشاهد الموثقة بيظهر عناصر التنظيم وهني عم يطبقوا عدالة الفصائل بإعدام مدنيين عزل بتهمة الموالاة لنظام الأسد.
‏
‏الرصاصات كانت إعلان عن نهج استمر سنين باستباحة الدم السوري تحت رايات طائفية.
‏
‏هون بحطلة بريف دير الزور أيضاً وتحديداً بحزيران 2013، شاف العالم وحدة من أبشع المجازر الطائفية.. 60 مدني بينهم نساء وأطفال اندبحوا ببيوتهم بدافع الحقد…
‏
‏مشاهد حطلة كانت أحد الدلائل إنه الثورة بفكر النصرة ما كانت إلا حرب إبادة لكل حدا بيختلف معهم.

‏وهون بآب 2013 بريف اللاذقية تسجلت مأساة إنسانية ما بتنتسى.. 190 ضحية سقطوا بمجزرة طائفية مروعة.. ما كانت مواجهة عسكرية.. كان هجوم غادر على قرى آمنة ترك وراه جثث وقصص وجع ما بيمحيها أي خطاب سياسي اليوم.
‏
‏وبكانون الأول من نفس السنة.. كانت عدرا العمالية مسرح لإبادة حقيقية.. شوفو .
‏
‏عمال وعائلاتهم مالهم أي ذنب إلا إنهم كانوا موجودين بالمكان الخطأ.. 80 ضحية فقدوا حياتهم.. في منهم انحرقوا وهني عايشين، بمشهد بيفرجينا قمة التوحش اللي مارسته الفصائل المتطرفة تحت اسم التحرير.
‏
‏ريف حماة كمان ناله نصيب من هالفظائع.. شوفوا
‏
‏بشباط 2014 فاتت القوى المتطرفة على قرية معان.. 42 مدني علوي بينهم 14 امرأة، تم تصفيتهم بدم بارد.. مجزرة طائفية انضافت لسجل أسود عم يحاول الجولاني وجيوشه الإلكترونية يغطوه بضجيج التحريض.
‏
‏وهون بإدلب بحزيران 2015 صارت مجزرة قلب لوزة.
‏
‏عشرات المدنيين من أهلنا الدروز سقطوا برصاص جبهة النصرة بانتهاك صارخ، ما وفر حتى الكبار بالسن، بس لفرض لون واحد وفكر واحد بقوة السلاح.
‏
‏هاد جزء بسيط جداً من مجازر وانتهاكات جبهة النصرة وفصائل المعارضة المتطرفة بمختلف مسمياتها طوال سنوات الحرب السورية.. وحتى بعد سقوط نظام الأسد.

‏النزيف ما وقف.. من مجازر الساحل بآذار 2025، لمآسي السويداء بتموز من نفس العام .
‏
‏إنه تنبش القبور وتجيب جرائم الماضي بس لتبرر فشلك بالواقع، هاد قمة الإفلاس.. السوريين اليوم فهموا اللعبة.. «نصف الحقيقة كذبة كاملة».. والنص التاني من المأساة صنعوه هدول النصرة وأخواتها.
‏
‏الجوع اللي عم ينهش الناس بسوريا ما بيتغطى بنبش القبور، والخبز والعيش الكريم وبكرامة أهم من خطابات الثأر.. فيقوا يا سوريين.. العدالة العورا هي ظلم مستمر، والمجرم لا يمكن يصير قاضي!.
‏
‏العدالة الحقيقية هي محاسبة الكل، مو تصفية حسابات سياسية لتثبيت كراسي جديدة انبنت على أنقاض قديمة!.