‏الرأسمالي المتوحش.. هكذا يحوّل الجولاني أنين السوريين إلى أرباح!

16 شهر بس.. كانت كفيلة إنها تهدم كلشي كان بقيان من أعمدة «الدولة» بسوريا
‏
‏من بداية 2025، ومع استلام الجولاني للسلطة، دخلوا السوريين بنفق ما كان على البال.. مو نفق سياسي هالمرة، بل نفق «التوحش الرأسمالي» اللي رافع شعار واحد: ادفع بالتي هي أحسن!
‏
‏3 مراسيم كتبها الجولاني من كم يوم بدم بارد.. بس هي بالحقيقة كانت رصاصة الرحمة على «زمن الخدمات المجانية»!
‏
‏المراسيم 44 و45 و46 مو مجرد أرقام.. هي صكوك بيع لقطاعات الكهرباء والمياه والتعدين وتحوليهن لشركات ربحية!
‏
‏الدولة اللي كان المفروض تكون «راعية» تحولت بعهد الجولاني لـ«تاجر» ما بيشوف بالمواطن غير «زبون» ولازم يمص دمه لآخر رمق
‏
‏لساتكن متذكرين صدمة فواتير الكهرباء الخيالية؟ هي ما كانت خطأ ومتوقعين يتراجعوا عنه.. هي كانت بالون اختبار لجس نبض الشارع.. واليوم بصدور المرسوم 45، صارت هالجباية الضخمة «قانون»
‏
‏السلطة عم تتملص من مسؤولياتها، وعم تترككن بوجه شركات قابضة، عم تدوّر كيف تعبّي خزائنها من جيوبكن الفاضية أساساً، بعد ما نهشت الليرة والدولار وكل قرش معكن
‏
‏ولأن الاستثمار بالوجع هو اللي بيجيب مصاري أكتر.. وصل المزاد لـ أجسامكم.. 71 مشفى حكومي عم يدخلوا اليوم مزاد الخصخصة العلني.. هيك أعلن رئيس هيئة الاستثمار طلال الهلالي بكل فخر!
‏
‏يعني الصحة كمان صارت استثمار والمريض صار «زبون».. معقول هاد اللي كان بدّن ياه السوريين لما ثاروا على نظام الأسد؟!
‏
‏أخي شو بدكن بكلامنا.. نحنا جماعة معارضين لهالحكم وكتار رح يعتبروا كلامنا مكايدة وأنه «ابكوا بترتاحوا» ومن هالحكي.. لهيك أنتوا السوريين شيلكم من كلامنا واحكولنا أنتوا كيف عايشين اليوم، أنتوا الي صار معظمكم بلا شغل وبلا مصدر دخل، والي عنده مصدر دخل يادوب بيطلع حق فاتورة الكهربا وجرة الغاز والخبزات.. أنتوا أنتوا الي عم تروحوا عالمشافي ويطلبوا منكم تنزلوا عالسوق تشتروا لوازم علاجكن وسط خدمات بالمشافي صارت شبه معدومة.. أنتوا احكولنا.. وخاصة جماعة «أبكي بترتاح».. والله يا أخي نحنا همنا عندكن لأن أنتوا الي عم تبكوا من الوضع الاقتصادي المنهار بالبلد ورح تبكوا كتير مع هيك حكم!
‏
‏هيك حكم عم يبيع البلاد بصفقات الكهرباء والطاقة والمياه والطبابة والتعدين.. وعم يبيع العباد برفع الدعم عن لقمة العيش وكل أسباب الحياة بسوريا.
‏
‏بعهد بشار الأسد ومع كل الاستبداد، بقي «تابو» الخدمات المجانية قائم كعقد اجتماعي.. أما اليوم فالاستبداد السياسي تعانق مع التوحش المالي، لينتج واقع طبقي مقرف.. الكهرباء والطبابة للأكابر.. والعتمة والموت للدراويش
‏
‏سلطة الجولاني ما عم تعمّر وطن، هي عم تصفّي ورثة شعب منكوب.. والسؤال ما عاد: كيف بدنا نعيش؟
‏
‏السؤال: شو رح يضل من سوريا بعد ما يخلص هالمزاد؟