‏من فضلكم.. حاكــ.موا هؤلاء!

محكمة الجولاني تصدر أحكام إعدام بحق بشار الأسد وشقيقه وعاطف نجيب وآخرين من رموز النظام السابق!
‏
‏طيب إذا مشينا معكن بمنطق «العدالة» تبعكن، وأنه بدكن تحاسبوا كل من أجرم بحق السوريين من رموز النظام السابق.. فخبرونا وين راحت هي العدالة لما انفتح بازار التسويات المفضوحة مع شخصيات من النظام السابق؟
‏يعني بوضوح.. ممكن تحاكمولنا فادي صقر ومحمد حمشو ونواف البشير ومدلول العزيز وفرحان المرسومي.. وغيرن كتير من رموز النظام السابق الي انتهاكاتهم معروفة ومثبتة وما بدها شهود؟!
‏حاكموا فادي صقر مثلاً بس على فترة قيادته للدفاع الوطني بحي التضامن.. حاكموا حمشو بس عالحديدات الي سرقهم من بيوت المهجرين بالشام وريفها.. حاكموا فرحان المرسومي بس على ارتباطه بإيران.. والا صعبة عليكن القصة مو؟!
‏
‏أنه بس سؤال بسيط شو الفرق بين هدول وهدوك الي حكموتهم إعدام، لحتى هدول بتنفتحلن أبواب التسويات والصفقات تحت الطاولة، وهدوك بتنرفع حبال المشانق فوق روسهم؟!
‏
‏طيب منشيل هدول عجنب.. شو رأيكم بمنطق العدالة تحاكموا أنفسكم على الجرائم الي ارتكبتوها وقت كنتوا سابقاً جبهة نصرة وتبنيتوا معظمها بشكل علني.. وما بدنا نعدّ كتير.. حاكموا أنفسكم بس على المفخخات الي نسفتوا فيها شوارع بدمشق وحمص وحلب كانت مزدحمة بالمدنيين بحجة أنه كنتوا عم تستهدفوا فروع أمنية وقتلتوا فيها مئات المدنيين الأبرياء.. حاكموا انفسكم على مفخخات القزاز والميدان وكفرسوسة ودوار الجمارك.. حاكموا انفسكم على مفخخات حي الراشدين بحلب الي استهدفت قافلة نازحين من كفريا والفوعة، والانتحاريين الي ضربوا مدرسة اطفال بحي عكرمة بحمص.. حاسبوا أنفسكم على مجازر ريف اللاذقية ومعان بريف حماة وقلب لوزة بإدلب وحطلة بدير الزور.. حاكموا المحيسني وأمثاله على الفتاوى الي شرعنت وأطلقت العنان للانتحاريين لينسفوا أحياء آمنة ويزهقوا أرواح المدنيين..
‏
‏حاكموا انفسكم على انتهاكاتكم بعد وصولكم للحكم.. على مجازر الساحل ومجازر السويداء الي كانت عناصركم عم تتفاخر فيها أمام الكاميرات!
‏
‏وقبل مانختم بدنا نعرج على هالنقطة.. أحد الاحكام الغيابية بالإعدام صدرت بحق طلال العيسمي مدير قوى الأمن الداخلي بالسويداء حالياً تحت قيادة الشيخ الهجري.. طيب سؤال.. هل كانت رح تطلع نفس النتيجة ونفس الحكم لو اختار العيسمي إنه يصف معكن ضد الهجري بأحداث السويداء؟! والإ كنتوا عينتوه أنتوا مدير للأمن الداخلي بالسويداء عن بُعد؟!

‏قال شو منظمة إرهابية جاي من تحت عباءة القاعدة باعتراف كل العالم عم تعمل محاكمات.. لو في عدالة حقيقية بهالعالم، وحكومات الدول بتشتغل بضمير، مو بس وفق المصالح، ما بيضل فيكن واحد على كرسته.. بس يلا بيجي يوم وبينتهي دوركن.. ومنشوفكن خلف القضبان وعم يحاكموكم كرموز نظام سابق!