‏سوريا.. أهلاً بكم في بلد الترينــدات!

‏والله العظيم نحنا ما عنا مشكلة شخصية معكن.. أخي اعتبرونا «معارضة خارجية»، شو ما بدكن.. بس والله انتوا الي عندكن مشكلة معنا ومع معظم السوريين.. صدقاً ما عم نلحّقلكن تريندات.. يعني بالعادة الصحافة بتدور وبتنكش على خبر تشتغلوا، أنتوا باليوم الواحد بتطجونا هديك الحسبة من الارتكابات والانتهاكات والاخطاء والسقطات والسخافات لدرجة ماعاد لحّقنا وراكن
‏
‏ بشرفكن شو يعني وزير ثقافة يعمل وليمة بدار الأوبرا والمطاعم حوليها معباية.. متل ما بزمناتو جميل الحسن صلى بالشارع والجامع مبين وراه على بعد كم متر..
‏
‏لك شو يعني تحريم مشروبات روحية ببلد متنوع والمفروض جاي على استثمار ومستثمرين وسياح.. يعني معقول بكرا يروح واحد عنادي ليلي يطلب زهورات!
‏
‏شو يعني صارعين راسنا كل يومين بهوية بصرية.. وهيك فجأة من دون سابق إنذار اليوم بتعملوا شلل تام واختناق مروري منشان بدلة شرطي وقطعة سلاح تركية.. لك روحوا اعملوا هوية اقتصادية للبلد بعد ما عطلتوا الإنتاج فيها وفاتحينها عالاستيراد وفوق منها محتكرينه بقيادة الأخ قتيبة بدوي..
‏
‏شو يعني كمان هالمشهد الكارثي بمسجد القدم الكبير بدمشق.. أطفال صغار بعمر الزهر لابسين زي عسكري وعُصابات دينية على راسهم وعم تقولوا انه هدول لتحرير القدس.. شو هالانتهاك الفاضح لحقوق الطفل وتحويله لآلة قتل.. بالمناسبة هاد الخبر كتير بيفرّح أمريكا وإسرائيل.. والله يا ابو محمد حيرتنا أنت معاهم والا عليهم!
‏
‏هي هيي «سوريا الجديدة» اللي كنتوا تدغدغوا مشاعرنا فيها؟!
‏
‏من يوم ما سقط نظام الأسد تسلل الوهم لعقول السوريين إنه الخلاص قرب.. بس اللي عم يصير عالأرض اليوم بيكشف قناع تاني.. قناع أفغنة سوريا على إيد رجل واحد اسمه أبو محمد الجولاني.. الزلمة ما عم يقدم مشروع وطن، بل عم يقدم مشروع إمارة بتبدأ بتجفيف منابع الحياة لتنتهي بالتجنيد للموت
‏
‏اتخيلوا بزمن انهيار اللقمة.. وبالتزامن مع تصنيف المفوضية الأمريكية للحريات الدينية سوريا كدولة «مثيرة للقلق بشكل خاص».. سلطة الجولاني بتعلن الحرب على المشروبات الروحية..
‏
‏طبعا هالقرار اجا ضمن سلسلة قرارات بعد منع الاختلاط بمطاعم الربوة ووجوب وجود «محرم» لكل امرأة بدها تزور اماكن سياحية بريف دمشق، وصولاً لمنع المكياج عن الموظفات باللاذقية، والتحرك لمنع دخول أطباء أقسام نسائية بالمستشفيات.. وفرض ضرائب خيالية عالمشروبات الروحية..
‏
‏الجماعة حصروا تقديم المشروبات الروحية بـ3 جيوب مسيحية بدمشق هي القصاع وباب توما وباب شرقي.
‏
‏وهون كمان ما فيك تقدم المشروب إلا إذا ابتعدت 75 متر عن أي جامع او كنيسة او مقبرة بالمكان و20 متر عن مخفر!
‏
‏هدول ما عم يدوروا على نظام.. عم يدوروا على شي مستحيل، عم يعجّزوك: محل بيبعد عن كنيسة وجامع ومقبرة بنفس الوقت، ومعك مهلة 3 شهور.. أكيد النتيجة أنك رح تقفل بعدها هالدكان!
‏
‏القرار طلع بحجة انه تلبية لشكاوى من الأهالي.. والله ممتاز شكاوى الناس من الكاس مسموعة ومستجابة فورا، أما شكاوى ملايين السوريين من الجوع والفقر والأزمات فمصيرها تنضب عالرف
‏
‏أنت بتعتقد أنه المشكلة بس القرارات الاجتماعية؟ تعال نشوف الصورة الأوسع.. سوريا اليوم بالمرتبة الأولى عربياً بمؤشرات الجريمة والعنف.
‏
‏مئات الدواعش الهربانين عم يندمجوا بهدوء بصفوف الأجهزة الأمنية الجديدة.
‏
‏تقرير لجنة التحقيق الأممية اللي نزل الجمعة الماضية بوثق عمليات قتل مستمرة خارج القانون وتعذيب واختطاف قسري وانتهاكات جسدية طالت نساء علويات ودروز
‏
‏بيقولوا إنها حرب على الفساد والرذيلة.. ونحنا منقول: هي حرب على سوريا نفسها.. على سوريا كلها.. هي محاولة لتحويل بلد كان عنوان للتنوع الى ثكنة جهادية مغلقة
‏
‏سوريا واقفة على صفيح ساخن عم ينتظر شرارة انفجار جديد.. وتطرف مستفحل رح ينفجر بوجه الجميع!